Тошкентдаги яна бир қурилиш компанияси дарахтларни нобуд қилгани аниқланди. Бу ҳақда Давлат экология қўмитаси матбуот хизмати хабар берди.
Маълум қилинишича, пойтахтнинг Яккасарой тумани Шота Руставели кўчаси «Дўстлик» боғи яқинида ярим тунда дарахтлар кесилгани тўғрисида келиб тушган маълумотга асосан Давлат экология қўмитаси, Экологик партияси фаоллари, Тошкент шаҳар экология бошқармаси, Яккасарой туман ҳокимлиги, туман прокуратураси ҳамда туман Ички ишлар бўлими ходимлари томонидан ҳамкорликда ўрганиш ўтказилди.
Ўрганишлар давомида Винера Tower МЧЖ томонидан қурилиш қилиш мақсадида ҳудуддаги 2 туп қимматбаҳо ва 4 туп кам қимматли бўлган жами 6 туп дарахт тегишли рухсатномасиз, қонунчиликка зид равишда бошқа жойга кўчириб ўтказилиши оқибатида дарахтлар нобуд қилингани, шунингдек, қурилиш учун котлован қазилиши натижасида 4 туп дарахтнинг илдизига шикаст етказилгани аниқланди.
2022 йилнинг 27 сентябрида Яккасарой тумани экология бўлими ходимлари томонидан мазкур ҳудудда хатлов ўтказилиб, 22 туп кўп йиллик дарахтлар мавжудлиги аниқланган. Ушбу дарахтларни кесмаслик бўйича қурилиш ташкилотига мажбурий кўрсатма берилган.
Шунга қарамасдан, 21 ноябрь куни қурилиш ташкилоти томонидан ушбу 22 туп дарахтнинг 6 тупи ноқонуний равишда бошқа ҳудудга кўчириб ўтказилган. 4 туп дарахтнинг эса илдизига шикаст етказилган.
Ушбу ҳолат бўйича «Ўсимлик дунёсини муҳофаза қилиш ва ундан фойдаланиш тўғрисида»ги қонунининг 32, 37-моддалари талаби бузилиб, ўсимлик дунёсига кўп миқдорда зарар етказилгани аниқланди.
Ҳозирда қурилиш ишлари бошланган ҳудудда 16 туп манзарали дарахт мавжуд.
Юқоридаги ҳолатлардан келиб чиқиб, дарахтларнинг ноқонуний кўчирилиши ва шикастланиши натижасида дастлабки ҳисоб-китобларга кўра, ўсимлик дунёсига 218 миллион 370 минг сўм зарар етказилган.
Амалдаги қонунчилик талабларига кўра, қурилиш лойиҳаларини амалга оширишдан олдин экологик меъёрий лойиҳа ҳужжатлари ишлаб чиқилиши ҳамда мажбурий тартибда Давлат экологик экспертизасидан ўтказилиши белгиланган. Аниқланишича, мазкур қурилиш объекти бўйича қонунчиликда белгиланган тартибда Давлат экологик экспертиза хулосаси олинмаган.
Ўрганиш натижаси бўйича тўпланган материаллар тегишли тартибда расмийлаштирилиб, туман прокуратурасига тақдим этилган.
Хабарда айтилишича, ушбу компания томонидан бундан аввал ҳам, 2022 йилнинг 23 мартида куни шу ҳудуддаги 6 туп дарахт ноқонуний равишда кесилган ва ўсимлик дунёсига 430 миллион 515 минг сўм миқдорида зарар етказилган.
Ушбу ҳолат Тошкент шаҳар экология бошқармаси томонидан тегишли тартибда рамийлаштирилиб, туман прокуратурасига тақдим қилинган ва етказилган зарарни ундириш учун 16 сентябрда Тошкент туманлараро иқтисодий судининг ажрими чиқарилган.
Аввалроқ Тошкентнинг Яшнобод туманида қурилиш компанияси томонидан 16 туп дарахт кесилгани юзасидан жиноят иши қўзғатилганди. Компаниядан ўсимлик дунёсига етказилган 3,5 миллиард сўм зарар ундирилган.
Изоҳ (0)