Ko‘p hollarda uzoq vaqt davomida bir joyda ishlash inson sog‘lig‘iga jiddiy zarar yetkazishi ham mumkin. Bunday holatlarda bel og‘rig‘i, ko‘z atrofida ajinlar paydo bo‘lishi va terida o‘zgarishlar kuzatiladi. Kompyuterda ishlash orqali nafaqat tajriba, bilim va maosh olishingiz, balki go‘zalligingizga zarar yetkazishingiz mumkin. The Voice nashri ofisda ishlash jarayonida tashqi ko‘rinishga zarar yetkazadigan holatlar haqida ma’lumot berdi.
Stulda noto‘g‘ri o‘tirish
O‘ylab ko‘ring: siz ofisda kuniga 6 soatdan 10 soatgacha kompyuter oldida vaqt o‘tkazasiz. Bu butun organizm uchun og‘ir yuk bo‘ladi. Biroq organizm qachondir bunga qarshi turishni to‘xtatadi.
Og‘riq kurak va umurtqa pog‘onasining orasida paydo bo‘ladi. Bunday holatda refleksli ravishda noqulaylikni kamaytiradigan pozitsiyani topishga harakat qilasiz. Keyinchalik bu qomatga yomon ta’sir qiladi va bukilish paydo bo‘ladi.
Qomatingiz uzoq vaqt davomida chiroyli ko‘rinishga ega bo‘lishini istasangiz kompyuterda ishlayotganda to‘g‘ri holatni saqlang. Orqangizni va yelkangizni tekislang, qo‘llaringizni stolga qo‘ying va oyoqlarni 90-120 daraja burchakka qo‘ying. Oyoqlaringiz yerga tegib turganligiga ishonch hosil qiling.
Shu bilan birga, ofis xodimlarining asosiy qoidasini eslang: har 15 daqiqada harakat qilish uchun ko‘zingizni chalg‘ituvchi mashqlarni qiling. Bo‘yinni o‘ngga va chapga buring, bir necha marta egiling. Tana bir joyda uzoq vaqt harakatsiz qolsa, miya buni qabul qilmaydi va turg‘unlik, qon oqimining buzilishi sababli “sekinlasha” boshlaydi. Bu nafaqat tashqi ko‘rinishingizga ta’sir qiladi, balki ishlashingizda ham qiyinchiliklarga sabab bo‘ladi.
Har soatda stoldan turing. Bir qultum suv ichish uchun sovitgichdan nimanidir olish yoki boshqa sabab bilan harakat qiling, keyin orqa miya, ko‘zlar va teri sizga “rahmat” aytadi.
Monitor yorqinligiga e’tibor bering
Kompyuter monitori go‘zallikning asosiy dushmanlaridan biri hisoblanadi. Undan tarqalayotgan ko‘k yuqori chastotali yorug‘lik terining erta qarishi pigmentatsiyasiga olib keladi va kollagenni yo‘q qiladi. Kosmetika ishlab chiqaruvchilar “raqamli qarish” kabi qiziqarli atamani o‘ylab topishgani ajablanarli emas.
Biroq ko‘k nurning yana bir xususiyati bor — u melatonin sinteziga yomon ta’sir qiladi, bu esa uyqu va bioritmlar bilan bog‘liq bo‘lgan gormon hisoblanadi. Bularning barchasi terining sifatiga va sog‘lig‘ingizga ta’sir qiladi.
Nurlanishdan qanday himoyalanish kerak? Tarkibida antioksidantlar bo‘lgan maxsus kosmetikadan foydalaning. Paketda bunday belgi bo‘lmasa, vitamin C tarkibiga e’tibor bering. U oksidlanish jarayonini zaiflashtiradi, erta qarishdan himoya qiladi. Asosiysi, monitorning yorqinligini kamaytirishni unutmang.
Gadjetlarni boshingizni pastga tushirgan holda ishlating
Qisilgan ko‘zlar, egilgan yelkalar va tirsaklarga bukilgan qo‘llar – bu holatda messenjerlar yoki ijtimoiy tarmoqlarga necha soat vaqt sarflaysiz? Tekshirish oson, telefon sozlamalarida “ekran vaqti” yorlig‘ini oching. Aynan shu vaqt davomida mushaklar va terining holatini yomonlashtiradigan, ikkinchi iyak paydo bo‘lishini qo‘zg‘atadigan pozada turasiz.
Smartfon qo‘lingizda bo‘lgan vaqtda bo‘yinning orqa qismi taranglashadi, old qismi esa bo‘shashadi. Undagi teri burmalarga to‘planib, yoshni kattaroq qilib ko‘rsatadigan burmalar hosil qiladi. Ekrandagi kichik matnni o‘qishga urinib ko‘z qisish uning atrofida ajinlarni paydo qiladi. Peshonangizni burishtirasiz, murakkab ma’lumotlarni “hazm qilasiz”, bu ham teriga yomon ta’sir qiladi. Ijtimoiy tarmoqlardan uzoq foydalanish esa ko‘zyosh oqishiga va ko‘z ostining shishiga sabab bo‘ladi.
Go‘zallikni saqlab qolish uchun zamonaviy texnologiyalardan voz kechishingiz shart emas. Smartfonning ko‘z darajasida ekanligiga ishonch hosil qiling, u bilan o‘tkazadigan vaqtni kamaytiring, tez-tez gimnastika bilan shug‘ullaning va kosmetologga boring.
Isitgichlar yoki radiatorlar yonida o‘tirish
Issiq va qulay, biroq bu hech qanday yordam bermaydi. Quruq havo tufayli hujayralar suvsizlanadi va qayta tiklana olmaydi. Shuning uchun 1 kg tana vazniga 30 ml nisbatda suv iching. Kun davomida kosmetik namlantiruvchi spreylar yoki termal, atirgul suvi aralashmasidan foydalanishingiz mumkin.
Kechasi teringizni dam olishiga imkon yarating va iloji boricha namlantirishga harakat qiling. Yuz niqobi sirtda nafas oladigan plyonka hosil qiladi, bu butun ish kuni davomida hujayralarning gidrobalansini saqlaydi.
Uzoq vaqt davomida harakat qilmaslik
Bir joyda o‘tirib ish qilish, jamoat yoki shaxsiy transportda sayohat qilish, uzoq vaqt tik turish — bularning barchasi varikoz tomirlari, sellyulit, shish va mushaklardagi kramplar bilan bog‘liq muammolarni keltirib chiqaradi.
Ishga borganda ko‘proq harakatlaning, tana holatini o‘zgartiring, tanaffus qiling, “oyoq ustidagi oyoq” pozitsiyasidan qoching va kechqurun qonni tarqatish uchun kontrastli dush qabul qiling.
Harakat va ishda to‘g‘ri o‘tirish chiroyli qomatga ega bo‘lishda katta ahamiyatga ega. Agar sifatli dam olish va to‘g‘ri ovqatlanishga rioya qilsangiz orzungizdagi ko‘rinishga ega bo‘lishingiz mumkin.
Mavzuga doir:
Izoh (0)