Ko‘z ostidagi qora dog‘lar millionlab insonlarning muammosiga aylangan. Bu nuqson ba’zilar uchun faqat uyqu yetishmasligidan, boshqalarda esa jiddiy kasallikning mavjudligidan dalolat beradi. Shuning uchun, birinchi navbatda, ko‘z ostidagi qora dog‘lar nima sababdan paydo bo‘lganini aniqlash kerak. Harper’s Bazaar nashri ko‘z ostida dog‘lar paydo bo‘lishining sabablari haqida ma’lumot berdi.
Yetarlicha uxlamaslik
Yetarlicha uxlamaslik ko‘z ostidagi qora dog‘larning eng keng tarqalgan sabablaridan biri hisoblanadi. Charchoq va to‘plangan stress bir zumda terida aks etadi va uning rangini o‘zgartirib, yupqalashtiradi. Bunday holatda qon tomirlari ko‘proq ko‘rinadi.
Qarish
Yosh o‘tishi bilan ko‘z atrofidagi teri ham yupqalashib, elastikligini yo‘qotadi. Vaziyatni saqlab qolishi mumkin bo‘lgan yagona narsa — filler yoki lazerli kosmetik muolajalardir.
Allergiya
Allergik reaksiyalarda ko‘zlar o‘ziga xos indikator bo‘lib xizmat qiladi. Qichishish va ko‘z yoshlar tanada ko‘p miqdorda gistaminlar ishlab chiqarila boshlaganligi haqida signal bera boshlaydi, bu esa kichik tomirlarni kengaytiradi.
Genetika
Olimlarning ta’kidlashicha, agar oilaning keksa a’zolari xuddi shunday kosmetik nuqsonga ega bo‘lsa, unda buning yosh avlodda namoyon bo‘lish ehtimoli yuqori bo‘ladi. O‘rtacha hisobda ko‘z ostidagi qora dog‘lar 25 yoshdan keyin paydo bo‘la boshlaydi.
Temir tanqisligi va anemiya
Anemiyada qon hujayralari to‘qimalarni yetarli miqdorda kislorod bilan ta’minlay olmaydi, bu esa terida qorayishlarni paydo qiladi. Shuning uchun qora dog‘larga ko‘pincha tanada temir yetishmasligi sabab bo‘ladi. Shuningdek bunday holatda bosh aylanishi va holsizlik kuzatilishi mumkin.
Zararli odatlar
Chekish va spirtli ichimliklar terini sezilarli darajada quritib, uni quruq va yupqa qiladi. Issiq ichimliklar qon tomirlarini kengaytirishga yordam beradi. Sigaret tutuni esa kollagenni yo‘q qiladi.
Mavzuga doir:
Izoh (0)