Toshkentda dori vositalarini 9,6 ming dollarga noqonuniy sotmoqchi bo‘lgan shaxslar ushlandi

Toshkent shahri Chilonzor tumanida dori vositalarining noqonuniy muomalaga kiritilishining oldi olindi, deb xabar beradi Iqtisodiy jinoyatlarga qarshi kurashish departamenti.

Qayd etilishicha, Bosh prokuratura huzuridagi departamentning Toshkent shahar boshqarmasi tomonidan tezkor tadbir o‘tkazilgan. Unda fuqarolar Sh.R., S.I. va boshqalar dori vositalarini dorixonalardan tashqarida muomalaga kiritish orqali daromad orttirishni ko‘zlab, fuqaro M.A.ga Chilonzor tumani “Bunyodkor” shoh ko‘chasida tegishli hujjatlari bo‘lmagan 3 000 dona “Nicozone S” va 800 dona “Infera” nomli xorijda ishlab chiqarilgan dori vositalarini 9 600 dollarga sotgan vaqtlarida ushlangan. Ularning yonidan jami 8 turdagi 9 720 dona dori vositalari ashyoviy dalil sifatida olingan.

Holat yuzasidan Jinoyat kodeksining 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish, shuningdek, dori vositalarini dorixonalardan va ularning filiallaridan tashqarida realizatsiya qilish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.