Shavkat Mirziyoyevning Fransiyaga tashrifi arafasida 18-noyabr kuni Parij shahrida O‘zbekiston va Fransiya o‘rtasidagi investitsiyaviy va savdo-iqtisodiy hamkorlikni yanada kengaytirishning asosiy omili sifatida ikki mamlakat ishbilarmon doiralari o‘rtasidagi munosabatlarni har tomonlama mustahkamlashga qaratilgan o‘zbek-fransuz biznes-forumi bo‘lib o‘tdi. Bu haqda Investitsiyalar va tashqi savdo vazirligi xabar qildi.
Ma’lum qilinishicha, tadbirda vazir Jamshid Xo‘jayev, Fransiya savdo bo‘yicha delegat vaziri Oliver Besht, O‘zbekiston-Fransiya ishbilarmonlar kengashi raisi, “Orano” kompaniyasi boshqaruvi raisi Klod Imoven, tegishli vazirlik va idoralar, tarmoq birlashmalari rahbarlari, shuningdek, ikki mamlakatning yetakchi kompaniyalari, xoldinglari va harakatlarining 150 dan ortiq vakillari ishtirok etdi.
Klod Imoven O‘zbekistonda investitsiya muhitini yaxshilash, infratuzilmani rivojlantirish, mintaqaviy va xalqaro savdo-iqtisodiy munosabatlarni yo‘lga qo‘yish va kengaytirish, mamlakatni global savdo tizimlariga integratsiyalash, sanoat kooperatsiyasini rivojlantirish bo‘yicha amalga oshirilayotgan islohotlarning izchilligi, samaradorligi va o‘z vaqtida amalga oshirilishini ta’kidladi. Shuningdek, u ikki davlat o‘rtasidagi munosabatlarni rivojlantirishning ijobiy dinamikasini va iqtisodiy sheriklikning har ikki mamlakat uchun ustuvor yo‘nalishlarda izchil kengayishini ta’kidlab, fransuz biznesi vakillarini o‘zbekistonlik tadbirkorlar bilan hamkorlikni yo‘lga qo‘yish va mustahkamlashga chaqirdi.
Jamshid Xo‘jayev o‘z qutlov so‘zida forum ishtirokchilarining e’tiborini O‘zbekistonga sarmoya kiritish to‘g‘risida qaror qabul qilishda hal qiluvchi ahamiyatga ega bo‘lgan bir qator muhim jihatlarga qaratdi. Xususan, soliqlar va QQS stavkalari keskin kamaytirilgani, investorlarning huquqlarini qonunchilik darajasida himoya qilinayotgani, 200 dan ortiq litsenziya va ruxsatnomalarning bekor qilingani va natijada 2021-yilda mamlakat iqtisodiyoti 7 foizga o‘sgani, eksport hajmi 1,5 baravar oshgani va inflyatsiya darajasi 18 foizdan 11 foizgacha pasaygani qayd etildi.
Iqtisodiyotga xorijiy investitsiyalarning o‘n baravar o‘sishi, 72 million aholisi bo‘lgan Markaziy Osiyo va 300 million aholisi bo‘lgan MDH mamlakatlari bozorlariga kirish imkoniyati mavjudligi ta’kidlandi. GSP+ Yevropa Ittifoqining benefitsiar maqomi O‘zbekistonga 6000 dan ortiq turdagi tovarlarni Yevropa Ittifoqi bozorlariga imtiyozli shartlarda eksport qilishga imkon beradi va hukumat eksport qiluvchilarning transport xarajatlarining 70 foizini qoplashga tayyor. Shuningdek, mamlakatda malakali, iqtidorli va bilimli yoshlar borligi, qazib olish uchun imtiyozli shart-sharoitlarga ega bo‘lgan ko‘plab tabiiy resurslar mavjudligi, sanoat ishlab chiqarishi, qishloq xo‘jaligi, farmatsevtika va turizm kabi sohalarda 22 ta MIZ tashkil etilishi qayd etildi.
O‘zbekiston hukumatining istiqbolli qo‘shma loyihalarning 50 foizini moliyalashtirishi, davlat korxonalarini chuqur xususiylashtirishga tayyorligi, shuningdek, transport yo‘llari kesishmasida O‘zbekistonning noyob geografik joylashuvi fonida G‘arb va Sharq, Shimol va Janub o‘rtasida qulay transport yo‘laklarini yaratadigan Xitoy—Qirg‘iziston—O‘zbekiston va Mozori-Sharif—Kobul—Peshavor temir yo‘llarini qurishi istiqbollari forum ishtirokchilarining katta qiziqishiga sabab bo‘ldi.
Qo‘shma loyihalarni amalga oshirishda, jumladan, yashil energetika, avtomobilsozlik va butlovchi qismlar ishlab chiqarish, farmatsevtika sanoati va oziq-ovqat mahsulotlari ishlab chiqarish kabi ustuvor tarmoqlarda fransuz tadbirkorlarini har tomonlama qo‘llab-quvvatlashga tayyorlik bildirildi.
Biznes-forum davomida O‘zbekiston va Fransiya vazirliklari, idoralari, yetakchi kompaniyalari, xoldinglari va harakatlari rahbarlari o‘rtasida “G2B”, “B2B” uchrashuvlari tashkil etilib, unda ishtirokchilar qo‘shma korxonalar tashkil etish va o‘zaro manfaatli savdo bitimlarini tuzishning moliyaviy-texnik jihatlarini batafsil ishlab chiqishga muvaffaq bo‘lishdi.
Izoh (0)