Buxoro viloyati “Xo‘jadavlat” temiryo‘l chegara bojxona postida Birlashgan Arab Amirliklaridan O‘zbekiston orqali Qozog‘istonga o‘tayotgan poyezd vagonida 10 milliard 610 million so‘mlik noqonuniy tamaki mahsulotlari ushlab qolindi.
Bojxona xodimlari hujjatda konteynerga 20 tonnadan ziyod og‘irlikdagi muqaddam foydalanilgan avto ehtiyot qismlari ortilgani yozilgani, aslida esa vagonga 700 ming 719 quti sigaretalar yuklanganini aniqlagan.
Respublikamiz hududidan tranzit tarzida harakatlanayotgan yuk poyezdi vagonlaridan birining inspeksion ko‘rik majmuasidan olingan rentgen tasviri bojxona xodimlarining diqqatini tortgan. Qolaversa, konteyner eshigi va ichki qismidagi belgi va raqamlar aks etgan nakleykalar qo‘lbola usulda o‘zgartirib qo‘yilgani ham shubhalarni orttirgan. Hujjatlarga ko‘ra, mazkur konteynerga 20 tonnadan ziyod og‘irlikdagi, muqaddam foydalanilgan avto ehtiyot qismlari ortilgan bo‘lishi lozim edi. Ammo tasvirlarda vagonga boshqa turdagi tovarlar ortilgani aniq-tiniq namoyon bo‘lgani sababli, mazkur konteynerni ochib, yuk egalari ishtirokida ko‘rikdan o‘tkazishga qaror qilingan.
Nihoyat konteyner amaldagi tartiblar asosida va xolislar ishtirokida ochildi va unda hujjatlarda ko‘rsatilgan avto ehtiyot qismlardan asar ham yo‘qligi ma’lum bo‘ldi. Mazkur tovarlar o‘rniga yuk kuzatuv hujjatlarida umuman ko‘rsatilmagan 700 ming 719 quti sigaretlar ortilgan ekan. Shunday qilib, hujatlarda ko‘rsatilmagan va vaqtincha saqlovga olingan 2 turdagi sigaretlarning umumiy qiymati 10 milliard 610 million so‘mdan oshmoqda, – deydi Husan Tangriyev.
Tamaki mahsulotlari O‘zbekistonga import qilishda aksiz solig‘iga tortiladigan tovarlar sirasiga kiradi. Bojxona chegarasi orqali tovarlar tranzitini amalga oshirayotgan yuk tashuvchilar chegarani kesib o‘tgan joyidagi bojxona organlariga o‘tkazilayotgan tovarlar to‘g‘risidagi, shu jumladan, ularning nomi, miqdori, vazni va yuklar qiymati haqidagi ma’lumotlarni taqdim etishlari shart. Hozirda yuqoridagi holat yuzasidan bojxona organlari tomonidan jinoyat ishi qo‘zg‘atilgan va tergov harakatlari olib borilmoqda.
Afsusuki, bugungi kunda mamlakatda noqonuniy tamaki mahsulotlari hajmi ortib bormoqda. Bojxona qo‘mitasi ma’lumotlariga ko‘ra, joriy yilning o‘tgan 9 oyi davomida qiymati 17 milliard 700 million so‘mlik 1,5 million quti tamaki mahsulotlarining O‘zbekistonga noqonuniy olib kirilishi va ichki hududdagi aylanmasiga chek qo‘yilgan. Bu ko‘rsatkich o‘tgan yilning shu davriga nisbatan 9 fozga ko‘p demakdir. Bu respublikaga noqonuniy tamaki mahsulotlari olib kirilishi va savdoga chiqarilishiga qarshi kurashish doimgidanda muhim bo‘lib borayotganini anglatadi. Mas’ul organlar oldida mazkur muammoni bartaraf etishdek dolzarb masala ko‘ndalang turibdi.
Izoh (0)