Adliya vazirining 2022-yil 11-noyabrdagi 272-sonli buyrug‘iga asosan tuman (shahar) adliya bo‘limlarida “Huquqiy ko‘mak darchalari” tashkil etilishi belgilangan.
Ta’kidlanishicha, “Huquqiy ko‘mak darchalari” sud, davlat boshqaruvi organlari, huquqni muhofaza qiluvchi organlar, advokatura hamda boshqa tashkilotlar bilan o‘zaro hamkorlikda qonunchilikdagi sudlar faoliyati bilan bog‘liq hamda sud-protsessual tartiblar haqida fuqarolarga og‘zaki huquqiy tushuntirishlar hamda maslahatlar berish bilan bog‘liq faoliyatni amalga oshiradi.
Murojaat qiluvchi shaxslarga ular bilan suhbat davomida beriladigan huquqiy tushuntirish va maslahatlar tavsiyaviy xarakterga ega hisoblanadi. Bundan tashqari, murojaat etgan shaxslarga huquqiy yordam ko‘rsatish qonunchilikda belgilangan asoslarga ko‘ra rad etilishi ham mumkin.
Mazkur darchalarga sud bilan bog‘liq hamda sud-protsessual tartibdagi masalalar yuzasidan huquqiy yordam olmoqchi bo‘lgan fuqarolar belgilangan qabul soatlari doirasida murojaat qilishlari mumkin bo‘ladi. Xizmat ko‘rsatish qonuniylik, xolislik, sud organlarining faoliyatiga aralashmaslik, byurokratizm va sansalorlikka yo‘l qo‘yilmaslik, korrupsiyaning oldini olishga doir chora-tadbirlar ustuvorligi, shaxsiy mas’uliyat prinsiplari asosida ko‘rsatiladi.
Mazkur buyruq ijrosini ta’minlash maqsadida viloyatdagi barcha tuman (shahar) adliya bo‘limlarida “Huquqiy ko‘mak darchasi” faoliyati yo‘lga qo‘yilmoqda. Bundan ko‘zlangan maqsad fuqarolarga huquqiy ko‘mak ko‘rsatilishini ta’minlash, shuningdek, aholida sud organlariga murojaat qilishda amaliy ko‘nikmalarni shakllantirish va rivojlantirish hamda fuqarolarning huquqiy ongi va huquqiy madaniyatini yuksaltirishga hissa qo‘shish hisoblanadi.
Izoh (0)