2022-yil 19-noyabr kuni “Navoiy kon-metallurgiya kombinati” aksiyadorlik jamiyati O‘zbekiston Jurnalistlari ijodiy uyushmasi bilan hamkorlikdagi “Milliy jurnalistika: an’analar davomiyligi va zamonaviylik” mavzusidagi II mediaforumini boshladi.
Ikkinchi marta tashkil etilgan mediaforumda O‘zbekiston hududlaridan tashrif buyurgan 50 nafar ommaviy axborot vositalari vakillari va jurnalistlar hamda O‘zbekiston Respublikasida akkreditatsiyadan o‘tgan xorijiy jurnalistlar ishtirok etmoqda.
O‘zbekiston Jurnalistlari ijodiy uyushmasi raisi Olimjon O‘sarov, O‘zbekiston Milliy axborot agentligi bosh direktori Abdusaid Ko‘chimov, O‘zbekiston jurnalistika va ommaviy kommunikatsiyalar universiteti rektori, O‘zbekiston Milliy media assotsiatsiyasi boshqaruvi raisi Sherzodxon Qudratxo‘ja, “Ishonch” va “Ishonch-Doveriye” gazetalari bosh muharriri Husan Ermatov kabi taniqli jurnalistlar – II mediaforum mehmonlari. Shuningdek, Buyuk Britaniyaning Reuters, Turkiyaning TRT, Rossiyaning “Sputnik”, Eronning “Fars news”, Qozog‘istonning “Xabar” axborot agentliklari va boshqa OAV vakillari mediaforumda qatnashmoqda.
Mediaforumining birinchi kunida ishtirokchilar uchun “NKMK” AJ Janubiy kon boshqarmasining Samarqand viloyat Qo‘shrabot tumani Zarkent qo‘rg‘onida joylashgan “Zarmitan” koniga press-tur tashkil etilgan. Jurnalistlar kon faoliyati bilan yaqindan tanishgan hamda ishchi-xodimlar bilan suhbatlashgan.
Tadbirning ikkinchi kunida Jizzax viloyati Zomin tumanidagi “NKMK” sanatoriysida “Milliy jurnalistika: an’analar davomiyligi va zamonaviylik” mavzusidagi II mediaforumining ochilish marosimi o‘tkaziladi.
Mediaforum davomida xalqaro media-ekspertlar – Ozarbayjon, Turkiya, Rossiya, Eron davlatlarining jurnalistlari mahorat darslarini o‘tadi. Shuningdek, tadbir ishtirokchilari o‘rtasida madaniy tadbirlar va voleybol, stol tennisi, shaxmat va shashka sport turlari bo‘yicha musobaqalar o‘tkaziladi.
Ma’lumot uchun: “Navoiy kon-metallurgiya kombinati” aksiyadorlik jamiyati (“NKMK” AJ) jahonda oltin ishlab chiqaruvchi yirik kompaniyalar beshtaligiga kiradi. Kombinat yer osti boyliklari zaxiralarini geologik qidirish, qazib olish va qayta ishlashdan to tayyor mahsulot olishgacha bo‘lgan ishlab chiqarish jarayonlari to‘liq amalga oshiriladigan yirik sanoat klasteridir. Kombinat zamonaviy kon-transport va texnologik uskunalar, ilg‘or texnologiyalar bilan jihozlangan konlar, zavodlarga ega zamonaviy korxonadir.
Izoh (0)