Термиз шаҳридаги ҳарбий қисмларнинг бирида хизмат қилган 18 ёшли аскар жасадидаги тиғ излари операция давомида орттирилган жароҳат излари экани айтилди. Бу ҳақда Мудофаа вазирлигининг тиббий таъминот бошқармаси бошлиғи Баҳодир Абдулаҳатов АОКАда бўлиб ўтган матбуот анжуманида маълум қилди.
Жарроҳлик амалиётидан сўнг кўкрак қафасини дренажлаш бўлади. Марҳумнинг яқинлари айтаётган ўша тиғни дренаж қўйган бўлади. Кўкрак қафасини тешиб, қовурғалар орасига тўрт-бешта дренаж қўйилади. Операциядан сўнг қон кетиб қоладиган бўлса, биз уни назорат қилишимиз керак бўлади-да. Тўсатдан ўлим ҳолатлари ёки асоратларининг олдини олишимиз учун бу — дренажлаш керак бўлади. Марҳумнинг яқинлари айтаётган тиғ мана шу. Марҳум айнан шу тиғлар асосида вафот этди дейиш нотўғри, — деди Баҳодир Абдулаҳатов.Масъулнинг маълумот беришича, вазирлик операция жараёни ва дренажлаш акс этган видеолавҳаларни марҳумнинг яқинларига тақдим қилган.
Марҳум аскарнинг баданидаги тиғ дейилаётган излар қандай ҳосил бўлганини исботловчи видеоларни марҳумнинг ота-онасига берганмиз. Бунга ким қизиқса, ташлаб бераман, — дейди вазирлик масъули.Матбуот анжуманида шунингдек, боланинг аҳволи оғирлашгач, нега фақат тоғаси ва онаси чақирилганига, отаси чақирилмаганига ҳам ойдинлик киритилди.
Боланинг ўзи ҳам операциядан олдин уни қарамоғига олган тоғасига телефон қилиб, ўзи тоғасини чақирган. Шунингдек, бизга онаси ва тоғасининг номерларини бергани учун биз ҳам аскар йигит берган телефон рақамларига қўнғироқ қилиб, унинг яқинларини вазиятдан бохабар қилганмиз. Ота-онасининг бир-бири билан қандай муносабатда эканлиги бизга қоронғи, — дейди Баҳодир Абдулаҳатов.Аскар йигитда ўлимидан икки ой илгари шамоллаш белгилари бўлгани қўшимча қилинди.
Онаси ва тоғасининг айтишича, йигитда ўлимидан икки ой илгари шамоллаш ҳолатлари бўлган. Қолаверса, йўтали бўлгани учун тиббиёт пунктида даволаниб юрган. Аҳволи яхшиланавермагач, Термиз ҳарбий госпиталига олиб борилган. Ва айнан шу ерда унинг кўкрак қафасида суюқлик аниқланган. Шундан сўнг тезкор равишда Термиз ҳарбий госпиталидан Марказий ҳарбий госпиталга ўтказиш буюрилган ва 11 ноябрда ўтказилган, — дейди вазирлик масъули.
Баҳодир Абдулаҳатов марҳумнинг жасадидаги изларни тиғ изи деб адашганини, агар улар вазирлик тақдим этган видео ва хулосалар билан танишса, вазирлик хулосасига қўшилишини айтмоқда.
Ўша тез ёрдам шифокори биздаги видеоларни кўриб, хулосаларни билганда, мен юз фоиз кафолат бериб айтаманки, ўша шифокор биз айтган хулосани маъқуллар эди, — дейди у.
Изоҳ (0)