“Kibersport turlarini yanada rivojlantirish va keng ommalashtirishga oid qo‘shimcha chora-tadbirlar to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar qildi.
Qarorga ko‘ra, kibersport turlari bo‘yicha respublika va xalqaro chempionatlar va turnirlar tashkil etish, shuningdek, nufuzli xalqaro va mintaqaviy musobaqalarda munosib ishtirok etish kibersport turlarini rivojlantirishning asosiy yo‘nalishlaridan biri etib belgilangan.
2023-yildan an’anaviy tarzda kibersport turlari bo‘yicha:
- har yili aprel oyida Uzbekistan Esports Championship respublika chempionati;
- har yili dekabr oyida “O‘zbekiston Respublikasi Vazirlar Mahkamasi kubogi” turniri;
- har yili iyun oyida “Yoshlar kubogi” turniri o‘tkaziladi.
Shuningdek, kibersportda “ping” muammosini bosqichma-bosqich bartaraf qilishni nazarda tutuvchi Kibersport turlarini rivojlantirish va keng ommalashtirish chora-tadbirlari dasturi tasdiqlangan.
O‘zbekiston davlat jismoniy tarbiya va sport universitetida 2023/2024-o‘quv yilidan “Sport faoliyati: kibersport” bakalavriat ta’lim yo‘nalishi ochiladi hamda ushbu yo‘nalish bo‘yicha o‘qish muddati 3 yil etib belgilanadi.
Uzbekistan Esports Championship respublika chempionatida oxirgi bir yilda g‘olib (1-o‘rin) bo‘lgan kibersportchilar 2023/2024-o‘quv yilidan mazkur bakalavriat ta’lim yo‘nalishiga kasbiy (ijodiy) imtihonlarni topshirishdan ozod qilinib, ularga maksimal ball beriladi.
Izoh (0)