Indoneziyaning Bali orolida G20 davlatlari yetakchilari 16-noyabr kuni bo‘lib o‘tgan sammitda qo‘shma bayonot qabul qilib, Rossiyaning Ukrainaga qarshi hujumini keskin qoraladi va urush insoniyatga azob-uqubatlar keltirayotgani, jahon iqtisodiyotidagi vaziyatni izdan chiqarayotganini ta‘kidladi. Bu haqda Reuters xabar berdi.
G20 a’zolari Rossiya qo‘shinlarining Ukraina hududidan to‘liq olib chiqilishini talab qilmoqda. Yetakchilar Ukrainada davom etayotgan urush oziq-ovqat va energetika xavfsizligiga salbiy ta'sir ko'rsatayotganini va butun dunyoda tartibsizliklarni keltirib chiqarganini yana bir bor tasdiqladi. Xitoy sammit yakunida betaraf qoldi. Rasmiylar Rossiyani ochiqdan ochiq tanqid qilmadi, qo‘llab-quvvatlamadi ham. Sammit yakunidagi bayonotda G20 davlatlari don kelishuvini amalga oshirish va qishloq xo‘jaligi mahsulotlarining ochiq savdosi tarafdori ekani keltirib o‘tildi.
Turkiya va BMT vositachiligida Ukraina portlaridan don va oziq-ovqat mahsulotlarini xavfsiz tashish bo‘yicha ikkita kelishuv imzolanganini olqishlaymiz. Qishloq xo‘jaligi savdosi bo‘yicha global qoidalarni yangilash, oziq-ovqat savdosini osonlashtirish hamda oziq-ovqat va o‘g‘it eksportiga Jahon savdo tashkilotining tegishli qoidalariga mos kelmaydigan tarzda taqiq yoki cheklovlar kiritmasligini tasdiqlaymiz, deyiladi bayonotda.G20 davlatlari oziq-ovqat inqirozidan aziyat chekkan mamlakatlarga yordam berishga, gumanitar faoliyatni sanksiyalardan olib tashlashga chaqirdi. Bayonotda energiya tashuvchilarga bo‘lgan talab arzon energiya manbalariga mos kelishi kerakligini ta’kidlandi. G20 davlatlari energiya resurslaridan foydalanishdagi kamchiliklarni bartaraf etishga va “energetika qashshoqligi”ga barham berishga intilishini e‘lon qildi. Ular muqobil energiya manbalariga o‘tish jarayonini tezlashtirmoqchi. Mamlakatlar vakillari iqlim o‘zgarishiga qarshi kurashishini ham aytdi.
G20 markaziy banklari narxlar barqarorligiga erishmoqchi. Hujjatda davlat vakillari korrupsiyaga mutlaqo toqat qilmaslikni e’lon qilishi qayd etildi. Mamlakatlar vakillari noqonuniy migratsiyaga qarshi kurashni e’lon qildi, jinoiy daromadlarni legallashtirish va terrorizmni moliyalashtirishga qarshi kurashni kuchaytirishga chaqirdi.
G20 dezinformatsiyaga qarshi kurashish va kibermakondagi tahdidlarga qarshi turish muhimligini ta’kidladi. Bundan tashqari kovid vaksinalariga universal kirishni ta’minlash aytib o‘tildi. Eng asosiy e’tibor yadro qurolidan foydalanishga qarshi qaratildi.
“Mojarolarni tinch yo‘l bilan hal qilish, inqirozni boshqarish, diplomatiya hamda muloqot hayotiy muhim ahamiyatga ega. Hozirgi davr urush davri bo‘lmasligi kerak”, — deyiladi bayontda.
Eslatib o‘tamiz, sammitda Ukraina prezidenti Vladimir Zelenskiy onlayn qatnashdi va Ukrainadagi urushni tugatish uchun 10 shartni sanab o‘tdi. Checheniston rahbari bu shartlarni “be’mani” deb baholadi va o‘zining shartlarini e’lon qildi.
Izoh (0)