Aksariyat ayollar tonal kremsiz yoki lab bo‘yog‘isiz yashashi mumkin, lekin ular hayotni tushsiz tasavvur qila olmaydi. Ko‘p yillardan beri tushni qo‘llash texnikasi to‘liq o‘zlashtirilgan, deb o‘ylash mumkin. Ammo unday emas. Kipriklar har doim mukammal ko‘rinishi uchun tush qo‘llashda quyidagi xatolardan qochishga harakat qilish lozim, deb yozadi Marie Claire.
Bitta tushdan ko‘pchilikning foydalanishi
Singlimiz yoki dugonamizning lab bo‘yog‘ini sinab ko‘rishimiz mumkin, lekin tush bir insongina foydalanishi kerak bo‘lgan narsadir. Chunki tush cho‘tkasi kipriklardagi bakteriyalarga to‘la bo‘lib, ular yuqoridagi holatda begona bakteriyalar bilan aralashib ketadi. Afsuski, bu ko‘z infeksiyasi va yallig‘lanishiga olib kelishi mumkin.
Tushni juda ko‘p miqdorda surtish
Tush cho‘tkasi talab qilinganidan ko‘proq mahsulotni oladigan tarzda ishlab chiqilgan. Bu kipriklarning bir-biriga yopishib ketishiga sabab bo‘ladi va qo‘llashdan keyingi natija xursand qilmaydi. Tushni kipriklarga surtishdan oldin cho‘tkani salfetka bilan artib, optimal uzunlik va hajmga erishish mumkin.
Noto‘g‘ri qo‘llash
Agar tush qo‘llashda maxsus qoidalar mavjud emas, deb o‘ylasangiz, xato qilasiz. Tushni to‘g‘ri surtish texnikasiga ko‘ra, kirpiklar tagidan ularning uchlarigacha bo‘lgan joyni ehtiyotkorlik bilan tarash kerak. Bu harakat kiprikning kerakli hajm va uzunligini ta’minlaydi.
Tush surtgandan keyin kipriklarni qayirish
Tush surtilgan kipriklarni qayirish orqali ular katta stressga duchor bo‘ladi. Bu kipriklarning yopishib qolishiga va to‘kilishiga olib kelishi mumkin. Bundan tashqari, ko‘zga ten, qalam yoki boshqa bo‘yoqlar surtilgan bo‘lsa, ularga ham putur yetishi mumkin. Shuning uchun makiyajdan avval kipriklarni kerakli ko‘rinishda qayirib olish tavsiya etiladi.
Suv o‘tkazmaydigan tushdan har kuni foydalanish
Ayollarning eng ko‘p uchraydigan xatolaridan biri kundalik ravishda suv o‘tkazmaydigan tush ishlatishidir. Suv o‘tkazmaydigan tush uzoq vaqt davomida turadi, lekin uni faqat suv tegish ehtimoli mavjud kunlarda surtish kerak. Bu to‘y yoki shunchaki ziyofat bo‘lishi mumkin, ammo quruq ob-havoda ofis uchun uni qo‘llamagan yaxshiroq. Har kuni suv o‘tkazmaydigan tushdan foydalanish kipriklarni quritib, vaqt o‘tishi bilan to‘kilishga olib keladi.
Izoh (0)