Shavkat Mirziyoyev Turkiyaning Istanbul shahri Beyo‘g‘li tumanidagi Istiqlol ko‘chasida yuz bergan portlash oqibatida ko‘plab insonlar qurbon bo‘lgani va jiddiy jarohat olgani munosabati bilan Rajab Toyyib Erdo‘g‘onga ta’ziya yo‘lladi. Bu haqda prezident matbuot xizmati xabar berdi.
Davlat rahbari vafot etganlarning oila a’zolari hamda yaqinlariga taskin-tasalli va bardamlik, jarohat olganlar tez fursatda sog‘ayib ketishini tiladi.
Istanbulning Beyo‘g‘li tumanidagi portlash 13-noyabr kuni 16:20 (Toshkent vaqti bilan 18:20) atrofida yuz bergan. Voqea sodir bo‘lgan Istiqlol ko‘chasi piyodalar uchun mo‘ljallangan bo‘lib, sayyohlar orasida eng ommabop joylardan biri hisoblanadi. U to‘liq yopib qo‘yilgan, shuningdek, o‘sha yerga yaqin joydagi Taksim masjidi ham yopilgan.
Shundan so‘ng ko‘chaga bomba o‘rnatgan shaxs qo‘lga olingan, u Anqara terroristik tashkilot deb hisoblaydigan Kurdiston ishchilar partiyasi (KIP)ga aloqador, deb taxmin qilingan.
Shuningdek, Istanbuldagi portlashda O‘zbekiston fuqarosi ham jabrlangani ma’lum bo‘lgan.
Izoh (0)