“Isroil mening yerimni va yurtimni bosib olmoqda” — Falastin prezidenti

Falastin prezidenti Mahmud Abbos Isroil bosh vaziri Benyamin Netanyaxu tinchlik o‘rnatishdan manfaatdor bo‘lmasa ham, u bilan muzokara o‘tkazishi kerakligini aytdi. Bu haqda Israel National News xabar berdi.

Abbosning ma’lum qilishicha, u Netanyaxuni 1990-yildan beri biladi. Prezident Isroil bosh vaziri tinchlikka ishonmasligi, lekin u bilan muomala qilishdan boshqa iloji yo‘qligini bildirdi.

“Isroil bilan muammo bor, Isroil mening yerimni va yurtimni bosib olmoqda. Men Isroil bosh vaziri bilan muloqot qilishga majburman”, — deya qo‘shimcha qildi Abbos.

Falastin rahbari bir necha bor Yaqin Sharqda tinchlik o‘rnatish bo‘yicha xalqaro konferensiya o‘tkazishni talab qilgan. 2020-yil sentabr oyida Falastin xalqaro konferensiyani o‘tkazish uchun taxminiy diplomatik harakatlarni boshlaganini bildirdi, ammo bu harakatlar natijasida hali hech narsa amalga oshmadi. Tomonlar o‘rtasidagi tinchlik muzokaralari 2014-yildan beri to‘xtab qolgan.

13-noyabr kuni Iordaniya qiroli Abdulla II Isroil ishg‘oliga barham berish va 1967-yil 4-iyundagi chegaralar ichida poytaxti Sharqiy Quddus bo‘lgan mustaqil Falastin davlatini barpo etishga chaqirgandi.