Наманганда электр таъминотида мунтазам узилишлар рўй бермоқда ва бу ҳолат аҳолининг ҳақли эътирозларига сабаб бўлмоқда. Бу ҳақда «Дарё» мухбири Азизбек Абдувалиев хабар берди.
«Электр таъминоти корхонасининг ЎзАвтодан нима фарқи бор?»
Куз-қиш мавсуми кириб келганидан сўнг вилоятда электр энергияси бўйича мурожаатлар кўпайгани, фуқаролар диспетчерлик хизматлари ёки Call-марказларга қўнғироқ қилиб тушишга қийналаётганидан сўнг «Наманган ҳудудий электр тармоқлари» корхонаси томонидан ижтимоий тармоқларда «Наманган электр таъминоти» деб номланган гуруҳ очилган. 7,5 мингга яқин аъзоси бўлган ушбу гуруҳ вилоятнинг турли ҳудудларидан йўлланган мурожаат, шикоят ва саволларга кўмилиб кетган.
«11 ноябрь Халқаро электр энергиясини тежаш куни экан. Наманганда бу санани ҳар куни нишонлаяпмиз» дея киноя қилади фойдаланувчилардан бири. «Бирор ҳоким ё прокурорнинг уйида бир соат ‘свет’ бўлмаса борми, нима бўлади?» дея савол йўллаган бошқа бир фойдаланувчи.
Чортоқ туманидан ёзилган шикоятда шундай сатрларни ўқиш мумкин: «Бизда тўрт соатлаб электр ёнмаяпти. Энг қизиғи, атрофимизда бешта санаторий бор. Дам олаётганлар республиканинг барча вилоятларидан келишади. Шарманда бўляпмиз. Бу ‘свет’ ўчишининг охири борми ўзи?»
«Нанай қишлоғида ‘свет’ни бир кунда 15 марта ўчириб-ёқишяпти. Нима, қишлоқдагилар одам эмасми?» дейилади Янгиқўрғон туманидан йўлланган эътирозда. Яна бир фойдаланувчи эса «Электр таъминоти корхонасини ЎзАвтодан нима фарқи бор? Сизлар ҳам олдиндан тўлов қилдириб исталган пайт ‘свет’ берасизлар, у ҳам нари борса 5 дақиқага» дея заҳарханда қилган.
«Газ босими пастлиги сабабли Тўрақўрғон ИЭС етарли қувват етказиб бермаяпти»
Миллий диспетчерлик маркази Наманган ҳудудий бўлими бошлиғи Муҳаммадали Ирисқуловнинг айтишича, совуқ кунлар бошланишидан аввал вилоятга кунига 13 миллион киловатт-соат электр энергияси етказиб берилган ва таъминотда деярли муаммо юзага келмаган. Ҳозирда бу кўрсаткич 15,5 миллион киловатт-соатга чиқарилган, бироқ эҳтиёжни қоплаб бўлмаяпти.
Яна бир муаммо Тўрақўрғон иссиқлик электр станцияси билан боғлиқ. 900 мегаватт қувватга эга станция газ босими пастлиги сабабли 715 мегаватт электр энергияси беряпти. Кам берилаётган 185 мегаватт эса Наманган шаҳрининг бир кунлик истеъмолига тенг.
Мутасаддининг таъкидлашича, электр энергиясига юкламанинг ҳаддан ташқари ортиб кетгани натижасида кабел ва трансформаторлар шикастланмоқда, электр симлари эриб кетмоқда. Авария бригадалари эса ҳар бир мурожаатнинг ортидан улгуриши қийин бўлмоқда, баъзан энди таъмирланган кабел ёки сим орадан ҳеч қанча ўтмай яна эски ҳолатига келмоқда.
Наманганда электр таъминотидан нолимайдиган ҳудудлар деярли йўқ, лекин улар орасида ҳам Наманган шаҳри, Чуст ва Уйчи туманларида ҳолат оғир эканлиги айтилмоқда.
«Электр тармоқлари корхонасидан тортиб ҳатто ҳокимликда ҳам ‘свет’ йўқ»
Ижтимоий тармоқ фаоли Шукуржон Тўхтасиновнинг айтишича, чиндан ҳам Уйчи тумани ҳозирда вилоятдаги электр таъминоти бўйича энг муаммоли ҳудудлардан бири бўлиб турибди. Аҳвол шу даражадаки, баъзан туман электр тармоқлари корхонаси, ҳатто ҳокимликда ҳам ‘свет’ йўқ.
Қизиқ томони, яқинда Энергетика вазири этиб тайинланган Жўрабек Мирзамаҳмудовнинг ўзи ҳам Наманган вилоятининг Уйчи туманидан. Вазирга туман аҳолиси номидан мурожаат ҳам йўлланган. Унда шундай дейилади:
«Вазир этиб тайинланганингизда туман аҳли хурсанд бўлиб, ўз табрикларини билдиришган эди. Сизга туман аҳли номидан энергетика тизимидаги мавжуд муаммоларни тезроқ бартараф этишингизни сўраб қоламиз. Туманда газ йўқ, электр энергиясида жуда кўплаб муаммолар мавжуд. Туман аҳолиси қиш фасли келмасидан аввал азият чекмоқда. Аҳоли тизимдаги камчиликларни тезроқ бартараф этишда амалий ёрдам сўрайди. Мурожаатни бефарқ қолдирмайсиз деган умиддамиз».
Шукуржоннинг билдиришича, бу мурожаатга Энергетика вазирлиги томонидан дарров муносабат билдирилган. Ҳозирда туманда вазирликнинг ишчи гуруҳи ўрганиш олиб бормоқда.
«Масаланинг яна бир томони бор. Аҳоли ва ижтимоий муҳим объектларга табиий газ етказиб берамиз деган баҳона билан Намангандаги барча метан газ заправкалар 12 соатлик чекловга ўтказилди. Лекин барибир аҳвол ўзгармади, аксинча баттар бўлди: аҳолида барибир газ йўқ, электр энергиясида доимий узилишлар, устига-устак автомобилларга газ тўлдириш шохобчаларидаги турнақатор навбатлар», — дейди Шукуржон Тўхтасинов.
Чиндан ҳам Наманганда электр энергиясидаги муттасил узилишлардан жабр кўраётган тоифалар қаторига қариялар ва болалар қатори ҳайдовчиларни ҳам қўшса бўлади: метан газ заправкаларида энди навбатлари етганида баъзан ‘свет’ ўчиб қолади, у ердан эсон-омон қутулиб чиққанларида эса чорраҳаларда светофорлар ишламаётганлиги сабабли ҳосил бўлган узундан-узоқ тиқинларга дуч келишади...
Изоҳ (0)