O‘zbekiston elchisi Ulug‘bek Maqsudov Saudiya Arabistonidagi eksport va import bilan shug‘ullanuvchi Al Kawashef kompaniyasi ijrochi direktori Anvar Rahil al-Taleb bilan uchrashuv o‘tkazdi, deb xabar bermoqda “Dunyo” axborot agentligi.
Qayd etilishicha, muloqot chog‘ida O‘zbekiston qishloq xo‘jalik, qandolat va tibbiyot mahsulotlarini Podshohlik bozoriga eksport qilish va ikki davlat o‘rtasida savdo hajmini oshirish yuzasidan fikr almashilgan.
Anvar Rahil al-Taleb O‘zbekistonda qishloq xo‘jaligi sohasini rivojlantirish bo‘yicha olib borilayotgan islohotlar, meva-sabzavotlarni qayta ishlash va ularning eksport salohiyatini oshib borishi chet ellik importchi hamkorlarni jalb etayotganiga urg‘u bergan.
“Kompaniyamizning izlanish natijalari shuni ko‘rsatib turibdiki, bugungi kunda O‘zbekiston yangi bozorlarni ochish va o‘z mahsulotlarini eksport qilishda katta yutuqlarga erishmoqda. Bunda mahalliy eksportchilarning yirik xalqaro ko‘rgazmalardagi ishtiroki jiddiy turtki bo‘lib xizmat qilmoqda”, — degan saudiyalik ishbilarmon.
Shu o‘rinda, u O‘zbekistonda Eksportni rag‘batlantirish agentligi va Eksportchilar uyushmasi ta’sis etilgani, ular respublikada ishlab chiqarilgan mahsulotlar eksporti hajmini oshirish bo‘yicha ko‘rayotgan chora-tadbirlar chet davlatlar bilan savdo aylanmasini oshishiga xizmat qilayotganini qayd etgan.
Anvar Rahil al-Taleb O‘zbekiston qishloq xo‘jalik mahsulotlarning sifati yuqoriligi, ularni Saudiya bozorlariga eksport qilish muhimligini ta’kidlagan.
Anvar Rahil al-Taleb joriy yil noyabr–dekabr oylarida mamlakatimizga safar qilishi, O‘zbekistonda ishlab chiqarilayotgan qishloq xo‘jalik, qandolat va tibbiyot mahsulotlarini Saudiya Arabistoniga eksport qilish bo‘yicha muzokaralar o‘tkazish istagida ekanini ma’lum qilgan.
Izoh (0)