Ижтимоий тармоқларда Тошкент вилоятидаги Ойбек божхона-чегара постида коррупцияга йўл қўйилаётгани, товарлар экспортида ва Ўзбекистонга хорижий валюталарни олиб киришда чекловлар борлиги тўғрисида видео тарқалди. Давлат божхона қўмитаси мазкур видеода кўтарилган масалалар юзасидан Бекобод шаҳри ва тумани тадбиркорлари ҳамда ОАВ вакиллари билан очиқ мулоқот ўтказди, дея хабар бермоқда «Дарё» мухбири.
Йиғилиш давомида видеода тадбиркорлар мутлақо далил-исботсиз гаплар айтгани, аслида уларнинг айримлари божхона-чегара постларида ноқонуний хатти-ҳаракатлар қилгани таъкидланди.
Давлат божхона қўмитаси раисининг биринчи ўринбосари Илҳом Мухторов видеодаги гаплар туҳматлигини айтди.Ўзбекистондан олиб чиқиш тақиқланмаган товарларни декларациялаш йўли билан олиб чиқинглар. Бунга ҳеч қанақа тақиқ йўқ. Ижтимоий тармоқда божхонани бутун халқнинг олдида шарманда қилишга уриниш нотўғри. Бу билан ҳеч ким барака топмайди. Республикада божхона қонунчилиги таъминланади. Видеода иккита одамнинг юзини ўгиртириб, божхоначилар пора олади, деган гапни айттирган. Бу туҳмат.
Суҳбат давомида Ўзбекистонга хорижий валюталарни олиб киришда тўсиқлар борлиги ҳақида айтилган гаплар ҳам асоссиз экани, бундай тақиқлар мавжуд эмаслиги таъкидланди.
«Мазкур пост орқали республикага ўтган 10 ой ичида 340 миллион АҚШ доллари миқдоридаги хорижий валюта 5 минг 217 та ҳолатда олиб кирилган. Шунинг 76 фоизи, яъни 260 миллион доллари 30 нафар фуқаро томонидан чегарадан олиб ўтилган. Масалан, бир аёл шу даврда 211 марта, яъни ҳар куни кириб-чиқиб, 31 миллион доллар маблағ олиб ўтган. Ўзбекистон Республикасига валюта олиб киришда чеклов мавжуд эмас», – деди қўмита бошқармаси бошлиғи Улуғбек Тожиев.
Давлат божхона қўмитаси бошқармаси бошлиғи Фарҳод Олимжонов айрим тадбиркорлар экспорт учун яратилган қулай шароитларни суиистеъмол қилмоқда.
Видеода чиқиш қилган тадбиркорлар Тожикистонда бож тўловларини кам тўлаш мақсадида аслида транспорт воситасига ортилган товарларни камайтирган ҳолда олиб чиқишни, декларациялашни божхона идораларидан сўрамоқда. Бу мутлақо нотўғри сўров. Биз расмий равишда, муҳр билан тасдиқлаб бераётган декларациямизда нима товар кўрсатган бўлсак, ўша товарни чиқаришга кафолат ва мажбурият оламиз. Агар декларацияда кўрсатилган товарлар чиқмаса, Тожикистон божхона идоралари бизга ишонмай қўяди. Бунинг ортидан Ўзбекистондан ҳар бир чиқаётган маҳсулотни тўлиқ текширув тизимига ўтади. Тўртта тадбиркор ортидан 6 мингта экспортчимизни қийнаб қўямиз.Мулоқот якунлангач, ҳолатни ўрганиш мақсадида журналистлар Тошкент вилояти «Ойбек» божхона-чегара постида бўлди. Постдан Ўзбекистонга ўтаётган ўнлаб тадбиркорлар билан суҳбатлашилди. Уларнинг айтишларича, постдан ўтишда ҳеч қандай муаммолар йўқ. Коррупцион ҳолатларга ҳам дуч келинмаган.
«Ҳозир Қозоғистондан Тожикистон орқали чигит олиб келяпмиз. Чегарадан ўтиш осон. Пора олмайди бу ердагилар. Пул олса, ҳаммани қамаб қўйишади-ку. Ҳужжатлар асосида ўтамиз. Кўп кутиб ҳам қолмаймиз», – дейди 30 йилдан бери ҳайдовчилик қилаётган Ғулом Исоқов.
Давлат божхона қўмитаси ахборот хизмати раҳбари (в.б.) Ҳусан Тангриев видеода интервью берганлар орасида жиноят иши қўзғатилган тадбиркорлар ҳам борлигини айтди.
«Тизимни обрўсизлантиришларига шунчаки томошабин бўлиб тура олмаймиз. Бу ерда кеча-ю кундуз виждонан ишлаётган ходимларнинг шаъни ва ишчанлик кайфияти турибди. Ўша материални тайёрлаган блогер ҳам таклиф қилинганди, лекин мулоқотга келмади. Улар билан қўмита раҳбарияти учрашиб, қаерда нохолислик бўлгани борасида вазиятни тушунтирди. Жиноят ишлари қўзғатилган ҳолатлар ҳам бор. Шу ишлар якунлангач, бу ҳолат юзасидан қатъий бир хулосамизни айтамиз», – деди қўмита вакили.
Изоҳ (0)