Toshkent viloyatida 1 tonnadan ortiq iste’molga yaroqsiz go‘sht sotilishining oldi olindi

Toshkent viloyati IIBB va prokuraturasi xodimlari tomonidan 1 tonna sifatsiz go‘sht mahsulotlari savdosiga chek qo‘yildi.

Ma’lum qilinishicha, viloyat IIBB Karantin tadbirlarini ta’minlash bo‘linmasi va prokuratura departamenti xodimlari bilan hamkorlikda Zangiota tumani o‘tkazilgan tadbir davomida, 1993-yilda tug‘ilgan fuqaro B.T. (qassob)ga tegishli tuman “Gulbog‘” mahallasida joylashgan (noqonuniy) kushxona xolislar ishtirokida ko‘zdan kechirilgan.

Tekshirish davomida kushxonada sanitariya talablariga javob bermaydigan holatda saqlanayotgan, inson hayoti va sog‘ligi uchun xavfli bo‘lgan (tekshiruv xulosasi bilan) 1 tonna 271 kilo go‘sht mahsulotlari daliliy ashyo sifatida hujjatlashtirilib olingan.

Mazkur holat yuzasidan fuqaro B.T. va boshqalarga nisbatan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari olib borilmoqda.

Mavzuga doir: Jizzaxda 1,2 tonna noma’lum hayvon go‘shti Toshkentga sotish uchun olib ketilayotganda to‘xtatib qolindi