Ukraina prezident ofisi rahbari maslahatchisi Mixail Podolyak Kiyev hech qachon Rossiya bilan muzokaralardan bosh tortmaganini ta’kidladi, deb yozadi “RBK”.
Uning so‘zlariga ko‘ra, Ukrainaning pozitsiyasi ma’lum va ravshan: avval Rossiya Ukraina hududidan o‘z qo‘shinlarini olib chiqadi, “keyin hammasi amalga oshadi”.
“Putin tayyormi? Shubhasiz. Biz esa konstruktiv baho beramiz: faqatgina Rossiya Federatsiyasining navbatdagi rahbari bilan muloqot qilamiz”, — deb yozgan Podolyak.
Moskva muloqot uchun ochiq ekanini bir necha bor bildirgan, biroq Kiyev muzokaralar stoliga o‘tirishni istamaydi.
Rossiya prezidenti matbuot kotibi Dmitriy Peskov 7-noyabr kuni Rossiya Ukraina bilan muzokaralar uchun ochiq ekanini, biroq hozir Kiyevning muloqotdan bosh tortgan pozitsiyasi tufayli ular uchun imkoniyat ko‘rmayotganini aytdi.
“Biz Rossiya tomoni ochiqligicha qolayotganini va muzokaralar orqali o‘z maqsadlariga erishishga tayyorligini bir necha bor aytganmiz. Ammo hozircha biz bunday imkoniyatni ko‘rmayapmiz, chunki Kiyev Rossiya tomoni bilan hech qanday muzokaralarni davom ettirmaslikni kodlashtirgan, ya’ni qonunga aylantirgan”, — dedi Peskov.
30-sentabr kuni Rossiyaga yangi hududlarning qo‘shilishi bo‘yicha referendumlardan so‘ng Ukraina prezidenti Vladimir Zelenskiy Vladimir Putin bilan muzokara olib bormasligini aytdi. “Rossiyani Putin boshqarayotgan paytda hech qanday muzokara bo‘lmaydi”, — degan Zelenskiy. “Shuning uchun biz Rossiya bilan muloqotga tayyormiz, ammo boshqa prezident bilan”, - deya qo‘shimcha qilgan edi u.
Ukraina prezidenti, shuningdek, Milliy xavfsizlik va mudofaa kengashi qarorini amalga oshirish to‘g‘risidagi farmonni imzolab, Vladimir Putin bilan muzokara olib borish mumkin emasligini ta’kidlagan.
Izoh (0)