Toshkentda bir guruh yigit xonadonga bostirib kirib, boshqa yigitni do‘pposladi (video)

Toshkentda nasha chekib olgan yigitlar bir uyga bostirib kirib, uy egasini do‘pposlagani aytilgan xabar va holat aks etgan video tarqaldi.

IIV matbuot kotibi Shohrux G‘iyosovning ma’lum qilishicha, voqea 2-noyabr kuni soat taxminan 21:00 larda Toshkentning Shayxontohur tumanidagi xonadonda yuz bergan. 1999-yilda tug‘ilgan I. M., 2000-yilda tug‘ilgan A.R. va 2005-yilda tug‘ilgan F.K. oldindan tanishi bo‘lgan 1993-yilda tug‘ilgan D.A. bilan o‘zaro og‘zaki janjallashib qolgan. So‘ng ular D.A. turgan xonadonga turar joy daxlsizlgini buzib kirib, uni urib tan jarohati yetkazgan.

Mazkur jarayonni 2005-yilda tug‘ilgan F.K. video tasvirga olgan, so‘ng ijtimoiy tarmoqlarda layk yig‘ish maqsadida tarqatib yuborgan.

Yuqorida qayd etilgan holat yuzasidan Shayxontohur tumani IIO FMB Tergov bo‘limi tomonidan Jinoyat kodeksining 105-moddasi (qasddan badanga o‘rtacha og‘ir shikast yetkazish) va 142-moddasi (fuqarolarning turar joyi daxlsizligini buzish) bilan jinoyat ishi qo‘zg‘atilgan.

Gumonlanuvchilar protsessual tartibda ushlangan. Tergov harakatlari davom etmoqda.