Россиялик хонанда Земфира Рамазонова 3 ноябрь Лондондаги Алберт Холлда концерт берди. Бу унинг «Borderline» альбомини қўллаб-қувватлаш учун ўтказилган Европа гастролидаги якуний концерти бўлди. Европадаги концертларида «Отманг» («Не стреляйте») қўшиғини ижро этиш олдидан хонанда ҳар доим Украинадаги урушга қарши чиқиш қилади. Лондондаги концерт ҳам бундан мустасно бўлмади.
Мен Украинани қўллаб-қувватлашимни билдириб ўтмоқчиман. Биламан, энди ҳеч қачон Украинада қўшиқ куйламайман. Лекин ўша концертларни: Харьковдаги, Днепр, Киев, Донецк ва менинг севимли Одессамдаги концертларни жуда яхши эслайман. Уларни жуда яхши эслайман. Ва, албатта, буни (хотираларни) мендан ҳеч ким тортиб олмайди, у абадий мен билан. Лекин шу билан бирга Россияга жуда ачинаман. Мен Россияни жуда яхши кўраман.Аммо ҳозир уруш давом этмоқда. Мутлақо маъносиз, шафқатсиз (уруш). Ҳозир менинг мамлакатим ҳам Украинани ҳам ўзини барбод қилмоқда. Чин дилдан тинчликни хоҳлайман. Урушга йўқ! — дея нутқини якунлади россиялик хонанда.
Земфира Рамазонова 9 октябрь куни Кипр жанубидаги Лимасол шаҳрида берган концертида Украинадаги уруш ҳақида биринчи марта очиқ гапирган эди. «Ҳар куни уруш тугасин, мамлакатим бу урушни тўхтацин, деб ибодат қиламан», — деди хонанда ва «Отманг» қўшиғини куйлади.
24 февраль — Россия Украинага бостириб кирган куни Земфира беш йил ичида биринчи яккахон концерти билан Москвада чиқиш қилган эди. Унда тўғридан-тўғри урушга қарши баёнотлар янграмаган, лекин ўша куни ижрочининг сайтида ва ижтимоий тармоқларида «Урушга йўқ» ёзуви пайдо бўлган. Хонанда 26 февраль куни Москвада навбатдаги концерт дастурини тақдим этди. Шундан сўнг, Земфира Россияни тарк этиб, Парижга кўчиб ўтгани маълум бўлди.
Март ойида Земфира «Отманг» қўшиғига Украинадаги жанговар ҳаракатлар акс этган клип эълон қилди, май ойида у урушга ишора қилувчи янги «Гўшт» қўшиғини тақдим этди. Европа гастроли бошланишидан олдин «Лукадан Земфира» мини-альбоми чиқарилди, унинг матнларида урушга ишоралар бор.
Изоҳ (0)