Давлат хавфсизлик хизмати республика бўйича бир қатор коррупцион ҳолатларга чек қўйди. Бу ҳақда ДХХ ахборот хизмати хабар қилди.
Қайд этилишича, Андижон вилоятидаги инжиниринг компания ходими ушбу компания буюртмачилиги асосида давлат дастури доирасида кам таъминланган оилалар учун қурилган кўп қаватли арзон уй-жойлардан 2 та хонадонни маҳаллий фуқаро номига расмийлаштириб, ушбу хонадонлар учун банкдан имтиёзли кредит ажратилишида ёрдам бериш эвазига 17800 доллар олган вақтида ушланган.
Тошкент вилоятида қайд этилган ҳолатда Олмалиқ шаҳар адлия бўлими ходими маҳаллий фуқарони Олмалиқ кон металлургия комбинатига ишга киришида ёрдам бериш эвазига 4000 доллар олган вақтида қўлга олинган.
Шунингдек, ушбу ноқонуний ишга алоқадор бўлган Олмалиқ шаҳридаги мактабгача таълим ташкилоти мудираси ҳам ушланган.
Самарқанд вилояти Иштихон тумани ирригация бўлимининг мансабдор ходими эса маҳаллий фермер хўжалик раҳбарига хўжаликнинг ўз ҳисобидан жорий этилган томчилатиб суғориш технологияси учун сарфланган маблағларнинг бир қисми давлат томонидан қопланишини маълум қилиб, унга 360 миллион сўм миқдорида субсидия маблағи ажратилишида ёрдам бериш эвазига 3500 доллар олган вақтида ушланган.
Ҳозирда барча ҳолатлар юзасидан жиноят ишлари қўзғатилган. Ҳозирда тергов ҳаракатлари олиб борилмоқда.
Изоҳ (0)