Qirg‘iziston Xavfsizlik kengashi kotibi Marat Imonqulov Mustaqil Davlatlar Hamdo‘stligi (MDH) mamlakatlari chegaralari yaqinida og‘ir texnikalarni joylashtirishni taqiqlashni taklif qildi. Bu haqda “24.kg” xabar berdi.
MDHga a’zo davlatlar Xavfsizlik kengashlari kotiblarining yig‘ilishida Marat Imonqulov dolzarb muammo va tahdidlar kamaymayotgani, aksincha ular mutatsiyaga uchrab, ko‘p yo‘nalishli va yanada xavfli bo‘lib borayotganini ta’kidladi. Har qanday davlat turli yo‘nalishlardan zarba olib, bir zumda geosiyosiy o‘yinning nishoni yoki quroliga aylanishi mumkin, deydi u.
“Yakka bir davlat butun boshli tahdidlarga yolg‘iz dosh berolmaydi. Xalqaro xavfsizlik kimningdir agressiv ambitsiyalariga bog‘liq bo‘lmasligi kerak. Beqarorlashtirishga qaratilgan har qanday urinishlarga samarali qarshilik ko‘rsatish talab etiladi. Shu bois, taraqqiyot yo‘lida barqarorlik va tinchlik manfaatlari yo‘lida o‘zaro hamkorlikni yo‘lga qo‘yish, shuningdek, murosai topish bo‘yicha Hamdo‘stlikka a’zo barcha davlatlar va jahon hamjamiyatining umumiy integrallashgan faoliyatiga ehtiyoj bor”, — dedi Marat Imonqulov.
Bundan tashqari, MDH formatida vakolatli tuzilmalar o‘rtasida tezkor axborot almashinuvini oshirish taklif etildi.
Qirg‘iziston Xavfsizlik kengashi kotibi, shuningdek, o‘zaro ishonchni mustahkamlash va barqarorlikni ta’minlash uchun mas’uliyatni oshirish maqsadida chegara hududlariga joylashtirilgan qurolli kuchlarning miqdori va sifati jihatdan bir-birini xabardor qilishni taklif qildi. U, shuningdek, agar bu MDHning tashqi chegaralariga taalluqli bo‘lmasa, chegaralar yaqinida og‘ir texnika, tanklar, artilleriya, ko‘p uchiruvchi raketa tizimlarining joylashishiga cheklovlar joriy etish tarafdori ekanini bildirdi.
Izoh (0)