O‘zbekistonda qish mavsumida o‘rtacha har 3 ta yong‘inning bittasi isitish moslamalaridan noto‘g‘ri foydalanish yoki nosoz jihozlarning ishlatilishidan kelib chiqqan. Bu haqda AOKAda Favqulodda vaziyatlar vazirligi, “Hududgazta’minot” AJ, Uy-joy kommunal xizmat ko‘rsatish vazirligi mutasaddilari ishtirokida o‘tkazilgan matbuot anjumanida ma’lum qilindi.
Qayd etilishicha, isitish mavsumida yuzaga kelishi mumkin bo‘lgan ko‘ngilsiz holatlardan biri bu — gaz-havo aralashmasi natijasida chaqnash, portlash hamda yong‘inlarning sodir bo‘lishi hisoblanadi. Tahlillarga ko‘ra, yong‘inlarning 30 foizi — elektr uskunalaridan foydalanish qoidalarining buzilishi, 23 foizi — ochiq olovdan ehtiyotsizlik bilan foydalanish, 20 foizi — isitish pechlarini qurish va ishlatish qoidalarining buzilishi, 9 foizi — bolalar sho‘xligi oqibatida, 8 foizi — chekishdagi ehtiyotsizlik, 3 foizi — gaz jihozlaridan foydalanish qoidalarining buzilishidan sodir bo‘lgan.
“Agar xonada gaz hidini sezsangiz, chiroq va uchqun chiqaruvchi moslamalardan foydalanmang, darhol xonani shamollatish chorasini ko‘ring. Bu haqda 104 raqami orqali gaz xizmatiga, yong‘in sodir bo‘lgan taqdirda, yong‘in-qutqaruv xizmatining 101 telefon raqamiga xabar bering”, — deyiladi xabarda.
Izoh (0)