Ўзбекистонда қиш мавсумида ўртача ҳар 3 та ёнғиннинг биттаси иситиш мосламаларидан нотўғри фойдаланиш ёки носоз жиҳозларнинг ишлатилишидан келиб чиққан. Бу ҳақда АОКАда Фавқулодда вазиятлар вазирлиги, «Ҳудудгазтаъминот» АЖ, Уй-жой коммунал хизмат кўрсатиш вазирлиги мутасаддилари иштирокида ўтказилган матбуот анжуманида маълум қилинди.
Қайд этилишича, иситиш мавсумида юзага келиши мумкин бўлган кўнгилсиз ҳолатлардан бири бу — газ-ҳаво аралашмаси натижасида чақнаш, портлаш ҳамда ёнғинларнинг содир бўлиши ҳисобланади. Таҳлилларга кўра, ёнғинларнинг 30 фоизи — электр ускуналаридан фойдаланиш қоидаларининг бузилиши, 23 фоизи — очиқ оловдан эҳтиётсизлик билан фойдаланиш, 20 фоизи — иситиш печларини қуриш ва ишлатиш қоидаларининг бузилиши, 9 фоизи — болалар шўхлиги оқибатида, 8 фоизи — чекишдаги эҳтиётсизлик, 3 фоизи — газ жиҳозларидан фойдаланиш қоидаларининг бузилишидан содир бўлган.
«Агар хонада газ ҳидини сезсангиз, чироқ ва учқун чиқарувчи мосламалардан фойдаланманг, дарҳол хонани шамоллатиш чорасини кўринг. Бу ҳақда 104 рақами орқали газ хизматига, ёнғин содир бўлган тақдирда, ёнғин-қутқарув хизматининг 101 телефон рақамига хабар беринг», — дейилади хабарда.
Изоҳ (0)