“Daryo” kundaligida 3-noyabrda sodir bo‘lgan eng muhim voqealar
“Daryo” nashri 3-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Tashqi ishlar vazirligi yadro urushiga yo‘l qo‘ymaslik haqida bayonot e’lon qildi
Rossiya Tashqi ishlar vazirligi yadro mamlakatlari beshligini (Rossiyadan tashqari — AQSH, Buyuk Britaniya, Fransiya va Xitoy) “bir-birining hayotiy muhim manfaatlarini cheklashga urinmaslikka” chaqirdi va bu halokatli oqibatlarga olib kelishini qayd etdi. TIV tomonidan e’lon qilingan “Yadro urushi oldini olish to‘g‘risida”gi bayonotda aytilishicha, Rossiya uchun birlamchi vazifa — yadro davlatlarining harbiy to‘qnashuviga yo‘l qo‘ymaslik. Rossiya harbiy doktrinada keltirilgan holatlardagina yadro qurolini qo‘llashi mumkin.
“Rossiya doktrinasida ushbu sohadagi holatlar juda aniq qilib belgilangan, ular faqat mudofaa yo‘nalishiga ega bo‘lib, keng talqin qilinishiga yo‘l qo‘yilmaydi”.
Unda ta’kidlanishicha, Rossiya tomonidan yadro quroli qo‘llanilishi, harbiy doktrinaga muvofiq, faqat ommaviy qirg‘in quroli ishtirokidagi tajovuzga yoki davlatning mavjudligi xavf ostida bo‘lgan taqdirda, oddiy qurol-yarog‘dan foydalanib amalga oshirilgan tajovuzga javoban mumkindir.
Rossiya TIV yadroviy “beshlik” mamlakatlarini yadroviy keskinlik vaziyatini hal qilish ustida ishlashga tayyorligini amalda ko‘rsatishga chaqirdi.
Gretsiya prezidenti va mudofaa vaziri Kiyevga keldi — OAV
Gretsiya prezidenti Katerina Sakellaropulu va mamlakat milliy mudofaa vaziri Nikos Panayotopulos Ukraina poytaxtiga tashrif bilan keldi. Bu haqda Gretsiyaning iEidiseis nashri xabar berdi. Nashrning yozishicha, Sakellaropulu Kiyevda Ukraina prezidenti Vladimir Zelenskiy bilan muzokara o‘tkazishi rejalashtirilgan.
“Sakellaropulu xonimning safari uzoq vaqtdan beri rejalashtirilgan edi, biroq bu haqda xavfsizlik nuqtayi nazaridan rasmiy xabar berilmagan. Tashrif Gretsiya BMP-1 texnikalarining Ukraina frontiga o‘tkazilishi bilan bog‘liq. Gap Egey dengizi orollarida to‘liq jangovar shay holatda saqlangan sovet davri jangovar mashinalari haqida ketmoqda, ularning Ukrainaga jo‘natilgani muxolifatning keskin reaksiyasiga sabab bo‘lmoqda”, — deb yozadi nashr.
KXDR ketma-ket ikkinchi kun ballistik raketalar uchirdi
Janubiy Koreya va Yaponiya harbiylari KXDR tomonidan Yapon dengiziga qarata ballistik raketa uchirilganini ma’lum qildi, deb yozadi Yonhap agentligi. Yaponiya Mudofaa vazirligi ma’lumotlariga ko‘ra, parvoz 7:45 (Toshkent vaqti bilan 3:45)da amalga oshirilgan. Raketa Tinch okeaniga borib tushgani taxmin qilinmoqda. Voqea sababli, Yaponiyaning uchta prefekturasi — Miyagi, Yamagata va Niigata aholisiga boshpanalarga yashirinib olish tavsiya qilindi.
8:41 (4:41)da, Yaponiya Mudofaa vazirligi xabariga ko‘ra, Pxenyan ikkinchi ballistik raketani uchirgan. Keyinroq uchinchi parvoz ham amalga oshirildi. Janubiy Koreya harbiylari raketalardan biri uzoq masofali, ikkitasi — qisqa masofali bo‘lganini ma’lum qilgan.
Pokiston sobiq bosh vaziri Imron Xon norozilik marshi paytida yuz bergan otishmada yaralandi
Pokiston sobiq bosh vaziri Imron Xon Gujranvala shahridagi siyosiy marsh chog‘ida yuz bergan otishmada oyog‘idan yaralandi. Geo TV ma’lumotlariga ko‘ra, hujumda Xonning “Tehrik-i-Insaf” (Adolat uchun harakat) siyosiy partiyasidan yana bir necha yetakchi ham jarohatlangan. Sobiq bosh vazirning o‘zi kasalxonaga yotqizilgan. Ayni paytda Hujumchi qo‘lga olingan.
Hodisa paytida Xon Islomobodda muddatidan oldin saylov o‘tkazish talabi bilan norozilik marshini o‘tkazayotgan edi, deb aniqlik kiritadi agentlik.
Vaziyat yuzasidan Pokiston bosh vaziri Shahbaz Sharif hujumni qoralab, ichki ishlar vaziri Rana Sanaullega zudlik bilan politsiya bosh inspektoridan hisobot talab qilishni buyurgan.
O‘zbekiston va Qirg‘iziston o‘rtasida Kampirobod suv ombori bo‘yicha bitim imzolandiO‘zbekiston tashqi ishlar vaziri Vladimir Norov qirg‘izistonlik hamkasbi Jeyenbek Kulubayev bilan uchrashuvi doirasida bir qator hujjatlar imzolandi. Bu haqda TIV axborot xizmati xabar qildi.O‘zbekiston—Qirg‘iziston Davlat chegarasining ayrim uchastkalari to‘g‘risidagi shartnoma;Andijon (Kampirobod) suv omborining suv resurslarini birgalikda boshqarish to‘g‘risidagi bitim;O‘zbekiston Suv xo‘jaligi vazirligi va Qirg‘iziston Qishloq xo‘jaligi vazirligi huzuridagi Suv resurslari xizmati o‘rtasida suv xo‘jaligi masalalari bo‘yicha hamkorlik to‘g‘risidagi bitim va boshqalar.
Shuningdek, uchrashuv chog‘ida Shavkat Mirziyoyevning Qirg‘izistonga bo‘ladigan davlat tashrifiga tayyorgarlik ko‘rish masalasi ham muhokama qilindi.
