“Gender tengligini ta’minlashga oid turli stereotiplarning oldini olishda OAV imkoniyatidan keng foydalanish zarur” — Tanzila Norboyeva

Senat raisi Tanzila Norboyeva Samarqanddagi iqtisodiy forumda “Gender tenglik, yoshlar, kelajakka sarmoya” mavzusida panel sessiyasida BMT siyosatida gender tenglikning o‘rni hamda O‘zbekistonda sohadagi normativ hujjatlarni tartibga solish ishlari haqida ma’lumot berdi.

Xotin-qizlar va erkaklar o‘rtasida tenglikni ta’minlash sohasida BMT faoliyatining ilk kunlaridanoq, qariyb 70 yil oldin gender masalalarini asosiy vazifalaridan biri sifatida belgilagan. Tashkilotning bosh kotibi Antoniu Guterrish o‘z murojaatlaridan birida: “Gender tengligiga erishish, xotin-qizlarning huquq va imkoniyatlarini kengaytirish zamonamizning tugallanmagan vazifasi va bugungi kunda dunyodagi eng katta inson huquqlari muammosidir” deb masalaning naqadar jiddiy ekanligini ta’kidlagan edi.

Bugungi kunda normativ huquqiy bazani xalqaro standartlardan kelib chiqqan holda takomillashtirish ishlarini tizimli davom ettiramiz. Gender ekspertizasidan samarali foydalangan holda xotin-qizlar uchun imkoniyat va kafolatlarni yanada kengaytirish, iqtisodiy tazyiqlarning oldini olishga oid normalar tatbiq etib boriladi.

Gender tengligini ta’minlashga oid turli stereotiplarning oldini olish, unga oid me’yorlarni aholi orasida keng targ‘ib qilishda ommaviy axborot vositalari, ijtimoiy tarmoqlar imkoniyatidan keng foydalanish zarur.

Shuningdek, xotin-qizlarni zamonaviy kasblarga, ayniqsa, axborot texnologiyalari, dasturlash, onlayn tijorat qilish sohalarida o‘qitish, ushbu sohada mehnat faoliyatini amalga oshirish uchun imkoniyatlar yaratish masalalariga e’tibor qaratish zarur.

Umuman olganda, davlat mutasaddi tashkilotlari, fuqarolik jamiyati institutlari, faol jamoatchilik — barchamiz sa’y-harakatlarimizni birlashtirib, ayollarimizning iqtisodiy imkoniyatlarini kengaytirish strategiyasini ishlab chiqishimiz va uni ro‘yobga chiqarishimiz zarur. Barcha hamkorlarimiz, jamiyatimiz faollarining sohadagi tizimli muammolarni bartaraf etish yuzasidan taklif va tavsiyalarini hamda bu borada yangi loyiha va tashabbuslarini ilgari surishda qo‘llaymiz, — deydi Senat raisi.