Farg‘onada fuqaro 1 milliard so‘mlik uyali telefonlarni noqonuniy olib kirgani aniqlandi

Farg‘onada 1 milliard so‘mlik uyali telefonlarning noqonuniy olib kirilishiga chek qo‘yildi. Bu haqda “Daryo”ga viloyat bojxona boshqarmasi axborot xizmati ma’lum qildi.

Qayd etilishicha, viloyat bojxona boshqarmasi kontrabandaga qarshi kurashish bo‘limi xodimlari tomonidan DXX xodimlari bilan hamkorlikda tezkor tadbir o‘tkazilgan. Tezkor tadbir davomida fuqaro Yo. boshqaruvidagi Mercedes-Benz rusumli avtotransport vositasi Farg‘ona tumani hududida to‘xtatilib, xolislar ishtirokida ko‘zdan kechirilgan.

Natijada mazkur avtomashina yukxonasining maxsus yasalgan qismida avtomashinada yo‘lovchi sifatida harakatlanib ketayotgan boshqa fuqaroga tegishli bo‘lgan xorijda ishlab chiqarilgan hamda bojxona rasmiylashtiruvidan o‘tganini tasdiqlovchi hujjatlari bo‘lmagan, umumiy qiymati 1 milliard 13 million so‘mlik 19 turdagi 484 dona uyali aloqa vositalari borligi aniqlangan.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.