O‘zbekiston Afg‘onistonda Mavlono Jaloliddin Balxiy nomidagi Mozori-Sharif xalqaro aeroporti faoliyatini tiklash bo‘yicha texnik yordam ko‘rsatish jarayonini yakuniga yetkazdi. Bu haqda O‘zA xabar berdi.
Ma’lum qilinishicha, 25-oktabr kuni uning yakuniga bag‘ishlangan tantanali marosim bo‘lib o‘tdi. Unda Transport vazirligi, “O‘zaviatsiya” agentligi, “O‘zaeronavigatsiya” markazi DUK, Uzbekistan Airports AJ, “O‘zgidromet” vakillaridan iborat O‘zbekiston delegatsiyasi ishtirok etdi. Tadbirda aeroportning qurilishi tugallangan obyektlarini foydalanishga topshirish va faoliyatni tiklash uchun zarur jihozlarni qabul qilib olish hujjati imzolandi.
Ma’lumki, Shavkat Mirziyoyev topshirig‘iga binoan, 2021-yilda Transport vazirligi, “O‘zaviatsiya” agentligi, “O‘zaeronavigatsiya” markazi DUK, Uzbekistan Airports AJ, “O‘zgidromet” vakillaridan iborat idoralararo komissiya tomonidan Mozori-Sharif xalqaro aeroportining texnik holati o‘rganilgan va zarur amaliy chora-tadbirlar belgilangan edi.
O‘tgan davr mobaynida O‘zbekistonning tegishli vazirlik, idoralari tomonidan qator ishlar amalga oshirilib, havo harakatiga xizmat ko‘rsatish, parvozni radiotexnik jihatdan ta’minlashga erishildi. Mozori-Sharif aerodromining uchish-qo‘nish yo‘lagi qoplamasi, havo kemalari uchun burilish yo‘laklari va to‘xtab turish joylaridagi belgilar bo‘yog‘i to‘liq yangilangan. “O‘zbekiston milliy elektr tarmoqlari” AJ tomonidan hududning elektr va yorug‘lik-texnik ta’minoti zamonaviy talab darajasiga keltirildi.
Aeroport haftasiga 4 ta mahalliy va 1 ta xalqaro havo qatnoviga xizmat ko‘rsata boshladi.
“Avvalo mehmondo‘st, afg‘on zaminining jafokash xalqiga har doim yelkadosh bo‘la oladigan O‘zbekiston prezidentiga minnatdorlik bildiraman. Mamlakatingiz rahbarining Afg‘onistonda vaziyatni barqarorlashtirish, xavfsizlikni ta’minlash, tinchlik muzokaralarini ilgari surish borasidagi sa’y-harakatini yuqori baholayman”, — degan Afg‘oniston muvaqqat hukumati tashqi ishlar vaziri o‘rinbosari Sher Muhammad Abbos Stanakziy.
O‘zbekiston transport vaziri Ilhom Mahkamovning qayd etishicha, Mozori-Sharif aeroporti faoliyatini qayta tiklash bo‘yicha hamkorlikda amalga oshirilgan chora-tadbirlar Afg‘onistonning iqtisodiy rivojlanishiga ko‘maklashish, bu zamindan amalga oshiriladigan parvozlar xavfsizligini ta’minlash va aeroportning samaradorligini yanada oshirish yo‘lida muhim qadam bo‘ladi.
Izoh (0)