Ўзбекистон Афғонистонда Мавлоно Жалолиддин Балхий номидаги Мозори-Шариф халқаро аэропорти фаолиятини тиклаш бўйича техник ёрдам кўрсатиш жараёнини якунига етказди. Бу ҳақда ЎзА хабар берди.
Маълум қилинишича, 25 октябрь куни унинг якунига бағишланган тантанали маросим бўлиб ўтди. Унда Транспорт вазирлиги, «Ўзавиация» агентлиги, «Ўзаэронавигация» маркази ДУК, Uzbekistan Airports АЖ, «Ўзгидромет» вакилларидан иборат Ўзбекистон делегацияси иштирок этди. Тадбирда аэропортнинг қурилиши тугалланган объектларини фойдаланишга топшириш ва фаолиятни тиклаш учун зарур жиҳозларни қабул қилиб олиш ҳужжати имзоланди.
Маълумки, Шавкат Мирзиёев топшириғига биноан, 2021 йилда Транспорт вазирлиги, «Ўзавиация» агентлиги, «Ўзаэронавигация» маркази ДУК, Uzbekistan Airports АЖ, «Ўзгидромет» вакилларидан иборат идоралараро комиссия томонидан Мозори-Шариф халқаро аэропортининг техник ҳолати ўрганилган ва зарур амалий чора-тадбирлар белгиланган эди.
Ўтган давр мобайнида Ўзбекистоннинг тегишли вазирлик, идоралари томонидан қатор ишлар амалга оширилиб, ҳаво ҳаракатига хизмат кўрсатиш, парвозни радиотехник жиҳатдан таъминлашга эришилди. Мозори-Шариф аэродромининг учиш-қўниш йўлаги қопламаси, ҳаво кемалари учун бурилиш йўлаклари ва тўхтаб туриш жойларидаги белгилар бўёғи тўлиқ янгиланган. «Ўзбекистон миллий электр тармоқлари» АЖ томонидан ҳудуднинг электр ва ёруғлик-техник таъминоти замонавий талаб даражасига келтирилди.
Аэропорт ҳафтасига 4 та маҳаллий ва 1 та халқаро ҳаво қатновига хизмат кўрсата бошлади.
«Аввало меҳмондўст, афғон заминининг жафокаш халқига ҳар доим елкадош бўла оладиган Ўзбекистон президентига миннатдорлик билдираман. Мамлакатингиз раҳбарининг Афғонистонда вазиятни барқарорлаштириш, хавфсизликни таъминлаш, тинчлик музокараларини илгари суриш борасидаги саъй-ҳаракатини юқори баҳолайман», — деган Афғонистон муваққат ҳукумати ташқи ишлар вазири ўринбосари Шер Муҳаммад Аббос Станакзий.
Ўзбекистон транспорт вазири Илҳом Маҳкамовнинг қайд этишича, Мозори-Шариф аэропорти фаолиятини қайта тиклаш бўйича ҳамкорликда амалга оширилган чора-тадбирлар Афғонистоннинг иқтисодий ривожланишига кўмаклашиш, бу заминдан амалга ошириладиган парвозлар хавфсизлигини таъминлаш ва аэропортнинг самарадорлигини янада ошириш йўлида муҳим қадам бўлади.
Изоҳ (0)