Xodimlari O‘zbekistonga ko‘chirilgan Huawei Rossiyani butunlay tark etishi mumkin

Xitoyning Huawei kompaniyasi smartfonlarni Rossiyaga to‘g‘ridan to‘g‘ri yetkazib berishni butunlay to‘xtatdi. Bu haqda “Izvestiya” gazetasiga tayanib “TASS” xabar bermoqda. 

Bundan tashqari, Huawei endi Rossiyaga planshetlar, noutbuklar, televizorlar va boshqa jihozlarni to‘g‘ridan to‘g‘ri yetkazib bermaydi.

Ma’lum qilinishicha, Huawei mahsulotlarini hali ham rasmiy do‘konda xarid qilish mumkin, biroq bu avvalroq yetkazib berilgan va sotilmay qolgan mahsulotlar bo‘ladi. 

Yangi asbob-uskunalar import qilinmasligi onlayn do‘konning yopilishiga olib kelishi mumkin. Huawei bahorda Rossiyaga uyali aloqa uchun baza stansiyalarini yetkazib berishni to‘xtatgandi. 

Kompaniya xodimlari O‘zbekiston va Qozog‘istonga ko‘chirilgan va ular yaqin orada Rossiyaga qaytib kelishlari aniq emas.

Xitoy brendining hamkor kompaniyasidagi nashr manbasiga ko‘ra, agar Huawei Rossiya bozorini tark etsa, brend mahsulotlarini Rossiyaga parallel import va Xitoydagi vositachilar orqali olib kirish mumkin bo‘ladi. Hozirda Huawei smartfon va uskunalarni vositachilar orqali yetkazib berish bo‘yicha muzokaralar olib bormoqda.