Ўзбекистонда октябрь ойида 1,2 фоизлик инфляция қайд этилди. Бу ҳақда Давлат статистика қўмитаси ҳисоботида қайд этилган.
Шу тариқа, октябрда нархлар апрель ойидан бери энг кўп ўсди. Апрелда 1,5 фоизлик инфляция қайд этилган эди.
Йил бошидан бери инфляция 9,4 фоизга етган бўлса, йиллик ҳисобда ҳамон 12,2 фоизни ташкил этмоқда.
Май ойида нархлар ошиши 1 фоизни ташкил қилган эди. Июнда эса 0,9 фоизлик инфляция кузатилган.
Июль ойида 2022 йил ҳисоби бўйича илк бор 0,1 фоизлик дефляция (нархлар тушиши) қайд этилган эди. Август ойида нархлар ўсишни бошлаган ва бу сентябрда ҳам давом этди.
Октябрда нархлар ошиши бўйича етакчилик хизматларга тегишли бўлиб, ой давомида уларнинг нархлари ўртача 1,5 фоизга ошди.
Озиқ-овқат маҳсулотлари ушбу даврда 1,4 фоизга, ноозиқ-овқат маҳсулотлар нархлари эса ой давомида 0,9 фоизга ошди.
Жорий йиилнинг октябрида озиқ-овқат маҳсулотлари ўтган йилнинг охирига нисбатан (11,5 фоиз) нархлар ошиши бўйича етакчиликни сақлаб қолди ва улар нархларининг 2022 йил январь—октябрдаги ўртача ойлик ўсиш суръати 1,1 фоизни ташкил этди.
Ноозиқ—овқат маҳсулотлар нархлари ушбу даврда 8,9 фоизга ошди, ўртача ойлик ўсиш суръати 0,9 фоизни ташкил этди.
Хизматлар нархларининг ўсиш суръати 2022 йилнинг январь октябрида 6,4 фоизга етди ва ўртача ойлик ўсиш суръати 0,6 фоизни ташкил этди.
Озиқ-овқат маҳсулотларининг йилик нисбатдаги нархларининг ўсиш суръати 2022 йилнинг октябрь ойида 15,9 фоизга етиб, ушбу гуруҳнинг мутлақ етакчилигини таъминлади.
Ноозиқ-овқат маҳсулотлар ва пуллик хизматлар ушбу даврда мос равишда 10,7 фоиз ва 7,5 фоизга қимматлашган.
Изоҳ (0)