Қашқадарё вилоятининг Деҳқонобод тумани ҳокими Зоир Алиқулов ОАВ вакиллари билан учрашувда айни кунда туман ҳокимларида ишлаш учун барча имкониятлар борлигини, ҳокимлар ташаббуси тўғри ва халқ учун манфаатли бўлса шахсан давлат раҳбари томонидан қўллаб-қувватланаётганини билдирди. Бу ҳақда «Дарё»га туман ҳокимлиги ахборот хизмати хабар берди.
Таъкидланишича, бугун Қарши шаҳридаги Журналистлар уйида Деҳқонобод ҳокими Зоир Алиқуловнинг журналистлар ва блогерлар учун навбатдаги матбуот анжумани бўлиб ўтган.
Унда сўз олган туман ҳокими ҳудуд иқтисодиётига инвестициялар жалб қилиш ва туманда аҳоли даромадларини янада ошириш бўйича амалга оширилаётган лойиҳалар хусусида маълумот берган. Шунингдек, ҳоким журналист ва блогерларни қизиқтирган саволларга жавоб қайтарган.
Тан олиш керак, 2016 йил туманда ҳоким сифатида иш бошлаган пайтимда туманда бирор бир янгилик, ўзгариш қилиш учун имкониятларимиз анча чекланган эди. Маблағ борасида муаммоларимиз бор эди. Ҳозир эса имкониятларимиз жудаям кенг. Туман ҳокими сифатида бирор бир ташаббусни илгари сурсак ташаббус халққа манфаат келтирадиган бўлса буни шахсан муҳтарам президентимизнинг ўзлари қўллаб-қувватламоқда. Ва керакли маблағни ҳам бермоқда. Бундай вазиятда биздан фақат ишлаш ва берилган маблағларни ўз ўрнида ишлатиш сўралади, — деди туман ҳокими Зоир Алиқулов.
Туман раҳбари матбуот анжуманида шунингдек, Оқсув—Деҳқонобод лойиҳаси, туманда аҳолини банд қилиши кўзда тутилган писта плантацияси ва 500 та янги иш ўрни яратувчи тикувчилик фабрикаси борасидаги саволларга ҳам жавоб берган.
Изоҳ (0)