“Daryo” kundaligida 26-oktabrda sodir bo'lgan eng muhim voqealar

“Daryo” nashri 26-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.

Putin yirik yadroviy zarbaga qarshi javob “mashg‘ulotlari”ni o‘tkazdi

Rossiya prezidenti Vladimir Putin boshchiligida dushmanning yadroviy zarbasiga javoban yadro zarbasi berish bo‘yicha o‘quv mashg‘ulotlari o‘tkazildi, deb yozadi “RBK”. Kreml quruqlik, dengiz va havo strategik to‘xtatuvchi kuchlar ishtirokidagi mashg‘ulotlar yakunlanganini ma’lum qildi. Uning davomida Kamchatkadagi Kura poligonida “Yars” va “Sineva” ballistik raketalari uchirildi.

Putin Rossiya mudofaa vaziri Shoygu va Bosh shtab boshlig‘i Gerasimovning strategik to‘xtatuvchi kuchlarni tayyorlash bo‘yicha hisobotlarini tingladi. Shoygu mashg‘ulotlardan maqsad — javob beruvchi yirik yadroviy zarbani ishlab chiqish ekanini ta’kidladi.

“Ukraina Qrimni, albatta, ozod qiladi” — Vladimir Zelenskiy

Ukraina noqonuniy ravishda anneksiya qilingan Qrim ustidan suverenitetini, albatta, qayta tiklaydi. Bu haqda Ukraina prezidenti Vladimir Zelenskiy vatandoshlariga videomurojaatida aytdi. “Biz Qrimni, albatta, ozod qilamiz. Mamlakatimizning ushbu bo‘lagini nafaqat umumukraina, balki umumyevropa zaminiga qaytaramiz”, — dedi Zelenskiy.

Uning so‘zlariga ko‘ra, Ukraina g‘alabasi tufayli Ukrainada qanchalik tez tinchlikka erishilsa, Rossiya boshqa mintaqalarga, jumladan, Eron bilan hamkorlikda Yaqin Sharqqa shuncha kam “yovuzlik sochishga ulguradi”. Davlat rahbari, shuningdek, 25-oktabr kuni Ukrainaga tashrif buyurgan Germaniya prezidenti bilan muzokaralar o‘tkazganini aytdi.

“Biz Germaniyadan taqdim etilgan zamonaviy va samarali havo hujumidan mudofaa tizimi uchun juda minnatdormiz. Xuddi shunday yangi tizimlarni kutyapmiz”, — dedi Ukraina rahbari.Ayni paytda AQSH Ukrainaga birinchi NASAMS zenit-raketa komplekslarini topshirdi

Ushbu kompleks mavjud va yaqinlashayotgan dushman samolyotlari, dronlari va qanotli raketa tahdidlarini aniqlash, urish va yo‘q qilish qobiliyatini maksimal darajada oshiradi

Turkmaniston Kaspiy dengizi bo‘yida harbiy o‘quv mashqlarini o‘tkazdi

Turkmaniston prezidenti Serdar Berdimuhamedov 24-oktabr kuni Bolqon viloyatidagi Dengiz o‘quv-mashq markazida bo‘lib o‘tgan harbiy mashg‘ulotlarni kuzatdi, deb xabar bermoqda “Xronika Turkmenistana”.

Turkmanboshida shahridagi aeroportda davlat rahbari qiruvchi, jangovar va yuk tashuvchi samolyotlarni ko‘zdan kechirgan. So‘ng u yerdan vertolyotda harbiy-dala mashg‘ulotlari o‘tkazilayotgan joyga yetib olgan.

Mudofaa vaziri Begench Gundogdiyev piyoda qo‘shinlar, harbiy-havo kuchlari, havo hujumiga qarshi mudofaa qo‘shinlari va harbiy-dengiz kuchlari shayligi haqida hisobot bergan.

Mashqlar chog‘ida harbiylar yerga va kemalarga o‘rnatilgan havo hujumiga qarshi mudofaa tizimlari yordamida havodagi nishonlarni urdi, Turkiyada ishlab chiqarilgan Bayraktar uchuvchisiz uchar qurilmasi, shuningdek, vintli hujumchi samolyotlar va reaktiv samolyotlar yerdagi shartli dushman obyektlariga zarbalar berdi.

Tayvanda harbiy xizmatchilar maoshi oshiriladi, majburiy xizmat muddati ham uzayishi mumkin

Tayvan harbiy xizmatchilarning oylik maoshini ikki baravar oshirib, kamida 15 000 Tayvan dollariga (465 dollar) chiqarmoqchi. Bu haqda South China Morning Post xabar berdi.Orol rasmiylari Pekin bilan keskinlik sharoitida majburiy harbiy xizmatni to‘rt oydan bir yilgacha uzaytirish rejasini ko‘rib chiqmoqda.

Avvalroq Xitoy yetakchisi Si Szinpin Xitoy Tayvan bilan tinch yo‘l orqali birlashishga intilayotgani, biroq kuch ishlatishdan voz kechishga va’da berish niyatida emasligini ma’lum qilgan. Tayvan esa hech qachon o‘z suvereniteti, erkinligi va demokratik qadriyatlarga sodiqligi bilan bog‘liq masalalarda yon bermasligini bildirgan.

Rossiya qamoqxonalaridagi vatandoshlarimiz urushga yuborilishiga tomoshabin bo‘lib turmaslik zarur” — iqtisodchi Otabek Bakirov O‘zbekiston rasmiylariga murojaat qildi

“Novaya gazeta. Yevropa” nashri Rossiya tarkibiga kiruvchi Mordoviyadagi koloniyadan “Vagner” yollanma jangchilari tarkibida Ukrainadagi jangovar zonaga jo‘natilgan mahbuslar shaxsini aniqlagani xabar qilingandi. Qamoqxonadan jami yuzdan ortiq kishi frontga yuborilgan bo‘lib, ularning yarmi O‘zbekiston, Tojikiston, Moldova, Serbiya va Misr shuningdek, Ukraina fuqarolari ekani keltirilgan.

Iqtisodchi Otabek Bakirov mazkur xabar yuzasidan O‘zbekiston rasmiylariga murojaat qilib, o‘zbekistonliklarning urushga yuborilishiga tomoshabin bo‘lib turmaslikka chaqirdi.

O‘zbekiston rasmiylari qamoqxonalardagi mahbus vatandoshlarimizning urushga yuborilishiga chetdan tomoshabin bo‘lib turmasligi zarur. Chunki mahbuslarda afsuski tanlov bo‘lmaydi, ularni bosim ostida majburlash ham shart emas. Kimdir mahbus-ku, jazoga loyiq deb qo‘l siltashi, ko‘z yumishi mumkin.

Lekin ular ham haq-huquqlarga ega, qolaversa vatandoshlarimiz. Adashmasam, O‘zbekiston va Rossiya o‘rtasida mahbuslarni almashish bo‘yicha bitim mavjud. Bir necha yil avval Rossiya qamoqxonalarida 7 ming o‘zbekistonlik mahbus borligi aytilardi. Bu kichik raqam emas, har biri alohida taqdir, alohida fojia”, — degan iqtisodchi Otabek Bakirov