Respublika Oliy sudi, Adliya vazirligi, Toshkent shahar ma’muriy sudi xodimlaridan iborat O‘zbekiston delegatsiyasi qonun ustuvorligini ta’minlash sohasida tajriba almashish va bu boradagi AQSH adliya idoralari ishlarini o‘rganish maqsadida Tennessi shtatiga tashrif buyurdi, deb xabar bermoqda “Dunyo” axborot agentligi.
Qayd etilishicha, mamlakat delegatsiyasining ushbu tashrifi Kongress kutubxonasi qoshidagi parlament diplomatiyasini rivojlantirishga ixtisoslashgan “Ochiq dunyo” yetakchilik markazi bilan hamkorlikda tashkil etilgan.
Ma’lumot uchun, 1999-yilda AQSH Kongressi tomonidan tashkil etilgan “Ochiq dunyo” dasturi xalq diplomatiyasini rivojlantirish, o‘zaro anglashuv va hamkorlikni mustahkamlash, har ikki tomon uchun eng muhim masalalar bo‘yicha g‘oyalar, kasbiy o‘sishni ta’minlash, biznes va shaxsiy aloqalarni rivojlantirish bo‘yicha tajriba almashish maqsadida AQSH hamkorlari uchun qisqa muddatli professional safarlarni tashkil etadi. “Ochiq dunyo” markazi mustaqil Vasiylik kengashi tomonidan boshqariladi va yil davomida kengaytirilgan almashuv dasturini boshqaradi. Markaz AQSH Kongressi kutubxonasining bo‘limi hisoblanadi.
2022-yil boshidan buyon Markaz O‘zbekiston vakillari uchun AQSHga uchta tanishuv safarini tashkil qilgan.
O‘zbekiston adliya idoralari vakillari AQSH Davlat departamenti, Amerika sudlari ma’muriy boshqarmasi, Tennessi prokuraturasi va sud xizmatlari vakillari, Kentukki sudyalari, shuningdek, AQSH adliya va sud tizimi sohasidagi ekspert va professorlar bilan uchrashgan.
Bundan tashqari, Kentukki shtatida bo‘lgan O‘zbekiston delegatsiyasi jinoyat ishlari bo‘yicha sudya Skott Grin, bosh sudyalar Chak Cherni va Patritsiya Long, shahar jamoatchi huquqshunoslari Devid Eldrij va Rob Kurs hamda mahalliy prokuratura vakillari bilan muloqotlar o‘tkazgan.
Kentukki shtatida sud-huquq tizimini takomillashtirish, sud hokimiyatining roli va nufuzini mustahkamlash, sudlarning mustaqilligini ta’minlash va sudyalarni tayyorlash mavzusida Tennessi universiteti yuridik kolleji ekspertlari va professor-o‘qituvchilari bilan konstruktiv suhbat tashkil etilgan.
Ushbu tadbirlar doirasida Amerika tomoniga O‘zbekiston taraqqiyotidagi asosiy yutuqlar, sud-huquq tizimini va adliya organlari faoliyatini har tomonlama takomillashtirish, jumladan, jinoyat-protsessual qonunchiligini liberallashtirish bo‘yicha ko‘rilayotgan chora-tadbirlar haqida batafsil ma’lumot berilgan. Sohani isloh qilish, huquq-tartibotni ta’minlash O‘zbekiston taraqqiyot strategiyasining ustuvor yo‘nalishlaridan biri ekani alohida ta’kidlangan.
Izoh (0)