Тошкентда 23 октябрь куни Ўзбекистон: Марказий Осиё бўйлаб замонлар оша саёҳат фильмининг тақдимоти бўлиб ўтгани ҳақида хабар берилган эди. Франциянинг Ўзбекистондаги элчиси Орелия Бушез ушбу фильм бўйича ўз фикрларини билдириб ўтди.
«Ўзбекистон, Марказий Осиё бўйлаб замонлар оша саёҳат» ҳужжатли фильми намойишида сизлар билан бирга бўлганимдан жуда хурсандман. Ушбу фильмни томоша қилгандан сўнг, биз 2022 йил ноябрь ойида Париждаги Луврда очиладиган бўлажак кўргазманинг кўлами ҳақида биринчи тасаввурга эга бўлишимиз мумкин», — дейди Бушез.
Элчининг таъкидлашича, мазкур фильм ва кўргазма орқали Франция жамоатчилиги Ўзбекистоннинг бой маданий мероси билан яқиндан танишиш имкониятига эга бўлади.
«Мамлакатингиз французлар учун у қадар таниш эмас, ҳозиргача кўпчилик бу Марказий Осиёдаги энг кўп аҳолига эга мамлакат эканлигини, жадал ривожланиб бораётганини ва жуда ҳурматга сазовор эканлигини билади. Халқимиз Самарқанд, Бухоро каби улуғ шаҳарларингиз ҳақида кўп эшитган, уларни зиёрат қилишни, карвон йўллари ўтган жойларни ўз кўзлари билан кўришни орзу қилади. Шунингдек, улар халқингиз шу кунга қадар сақлаб келган барча маданий мерос хазиналарини кашф қилишни орзу қилади», — дейди Франция элчиси.
Унинг сўзларига кўра, Самарқандга Франциядан келаётган сайёҳлар сонининг кўплиги ҳам шу билан боғлиқ, уларнинг сони кун сайин ортиб бормоқда. Масалан, йилига 20 минг нафар француз сайёҳлари Ўзбекистонга ташриф буюради.
Элчи фильм устида ишлаган барчага, биринчи навбатда унинг директори жаноб Даракчиевга ва Le Poisson Volant компанияси продюсери Софи Гупи хонимга миннатдорчилик билдирган.
Фильм Маданият ва санъатни ривожлантириш жамғармаси томонидан Франциянинг Лес Поиссонс Воланц кинокомпанияси, ARTE маданият телеканали ва Лувр музейи билан ҳамкорликда яратилган.
Ушбу фильм режиссёр Живко Даракчиев томонидан суратга олинган бўлиб, Ўрта Ер денгизи ва Хитой ўртасидаги Марказий Осиёнинг қоқ юраги – турли тамаддунлар, маданиятлар, динлар ва турмуш тарзлари рўбарў бўладиган воҳага карвон йўллари бўйлаб ҳаракатланаётган ғойибона саёҳатчилар тилидан сўзланувчи ҳикоя ҳисобланади.