“Paxtakor” klubi bosh murabbiyi Maksim Shatskix Superliga 22-turi doirasida “Qo‘qon-1912”ga qarshi kechgan o‘yindagi (5:2) g‘alabadan keyin o‘z fikrlari bilan o‘rtoqlashdi.
O‘yin haqidaBirinchi bo‘limda ko‘p vaziyat yaratdik, biroq raqib ikki zarbasi bilan hisobni tenglashtirib ketdi. Xatolar bo‘ldi, albatta. Har bir jamoa adashadi. Ikkinchi bo‘limda tezlik qo‘shsak, barchasi joyida bo‘lishini sezib turgandik. Yanada keskinroq o‘ynay boshladik va buni natijada aks ettirdik.
Eldor Suyunovning holati borasida
Unda ma’lum bir muammolar bor edi. Hozir mashg‘ulotlarda tayyorgarlikni davom ettirmoqda. Keyingi uchrashuvda ma’lum bo‘ladi.
Chempionlik imkoniyati haqida
Imkoniyat doim bor. Oldinda to‘rtta o‘yin qolgan. Biz doim o‘z o‘yinimizga tayyorlanamiz. Qolganini mavsum tugagach ko‘ramiz.
O‘zbek klublaridagi kamchiliklar borasida
Stadionlar borasida kamchiliklar bor. Sifatli maydonlar yetishmayapti. Bolalarimiz, yoshlarimiz uchun ham sifatli maydonlarga ega bo‘lishimiz kerak. “Tomorqa”da mashg‘ulot o‘tkazgan futbolchidan chiroyli futbol talab qilib bo‘lmaydi.
Bunday sharoitda raqib bilan emas, boshqa narsalar, deylik maydon va to‘p bilan kurashishga to‘g‘ri keladi. Bizning iqlimda maydon ideal bo‘lishi kerak. Chunki yilning 10 oyida quyosh charaqlab turgan bo‘ladi. Balki pul sababmi yoki yaxshi agronomlar yetishmayaptimi, bilmadim.
Hozirda istalgan jamoa futbol o‘ynashni biladi. Kombinatsiyalar orqali o‘yin tashkil qiladi. Faqat ayrim jamoalar oddiy futbol ko‘rsatmoqda. Agar maydon talabga javob bermasa, qanday kombinatsion futbol ko‘rsatish mumkin? Mart oyida katta musobaqaga mezbonlik qilamiz. Maydonlarimiz qanday holatda? “Bunyodkor” ta’mirlash ishlarini olib boryapti. “Jar” yangidek hali. “Paxtakor” stadioni bor, tamom.
2023-yilgi xalqaro musobaqalar va yig‘inlar tarkib shakllantirishga xalal berishi haqida
Biz faqat o‘z yig‘inlarimiz va mashg‘ulotlarimizni rejalashtiramiz. FIFA kunlari, mashg‘ulotlar bor. To‘g‘ri aytdingiz terma jamoaga futbolchilarimiz chaqiriladi. Biz bu bilan faxrlanamiz. Biroq shunday palla bo‘lyaptiki, jamoada 9-10 kishi qolyapti va biz U-19 jamoasidan futbolchi olyapmiz.
Ayrim o‘yinchilarimiz Tojikistonga borib keldi. Jarohatdan hali tuzalgani yo‘q. O‘z futbolchilarimizni qancha vaqtga, qanday musobaqalarga qo‘yib yuborishimiz mumkinligi haqida reglament bor. Terma jamoa bu — terma jamoa. Ular qanday holatda ortga qaytadi, bilmaymiz. Ko‘ramiz, o‘zaro til topishamiz deb o‘ylayman.
Yozgi transfer oynasida jamoa kelgan futbolchilar haqida
Ularni 50/50 baholayman. Qishda yana muhokama qilamiz. Tarkibni kuchaytiramiz. Sog‘lom raqobat ham bo‘lishi zarur. Bu futbolchining ruhiyatiga ta’sir qiladi. Bugun men, ertaga o‘rnimga boshqasi maydonga tushishi mumkin, degan fikr bo‘lishi lozim.
Maksim Shatskix, “Paxtakor” bosh murabbiyi
Izoh (0)