Ўзбекистонда 2022 йилда 18 мингдан ортиқ жониворни овлашга рухсат берилгани хабар қилинганди. Давлат экология қўмитаси томонидан ёввойи ҳайвонлар ва Ўзбекистон Республикасининг Қизил китобига киритилган ноёб, йўқолиб бораётган ҳайвонларни овлашга қаратилган квота ҳақида эълон қилинган хабар юзасидан маълумот берди.
Қайд этилишича, республика ҳудудида ёввойи ҳайвонларни табиий муҳитдан ажратиб олиш (овлаш, тутиш, йиғиш) Ўзбекистон Республикасининг 2020 йил 8 июлдаги «Ов қилиш ва овчилик хўжалиги тўғрисида»ги қонунга мувофиқ амалга оширилади. Қонуннинг 14-15-моддаларига асосан квота белгиланади.
Ушбу Қонунга мувофиқ Давлат экология қўмитаси ёввойи ҳайвонларни тутишга доир квотани Фанлар академиясининг хулосасини инобатга олган ҳолда тасдиқлайди. Ўз навбатида, Фанлар академияси ёввойи ҳайвонларни табиатдан овлаш бўйича хулосасини илмий асосланган ҳолда ўрганади, табиатдаги мавжуд бўлган сонига аниқлик киритиб, фақат маълум миқдоригагина беради.
Ушбу квота ёввойи ҳайвонларни фақат спорт ва ҳаваскорлик учун овлаш учун эмас, балки илмий жиҳатдан ўрганиш ва назорат қилиш мақсадида белгиланади. Шунингдек, уларни сунъий яратилган питомникларда кўпайтириш, фармацевтикада фойдаланиш ҳам қонун билан белгиланган.
Қизил китобга киритилган 4 бош Қизилқум архари ва 4 бош морхўр фақатгина кўпайтириш ва табиатга қўйиб юбориш учун берилгани аниқ кўрсатиб ўтилган.
Тасдиқланган квотадаги айрим ҳайвонларнинг миграция йўлларини ўрганиш мақсадида тутилиб, уларга тегишли белгилар (микрочип, узук) қўйилади ёки улардан таҳлил олиниб тириклайин табиатга қўйиб юбориш учун ҳам ажратилади.
Изоҳ (0)