2020-yilda Kushtau tog‘ida foydali qazilmalar qazib olinishiga qarshi namoyishlarda qatnashgan boshqird millatchilari safarbarlikka javoban hamda respublikaning Rossiyadan ajralib chiqishi haqidagi shiorlar ostida qurolli qarshilik harakatini tuza boshladi. Bu haqda “Verstka” nashri xabar berdi, u millatchilar yetakchilaridan biri Ruslan Gabbasov bilan suhbatlashdi.
Nashr ikkita harakat haqida hikoya qiladi. Birinchisi Gabbasov rahbarlik qiluvchi “Boshqird milliy siyosiy markazi” bo‘lsa, ikkinchisi — anonim boshqird partizanlari bo‘lib, ular Ukrainadagi urush fonida yuzaga chiqqan. Nashr “Boshqird qarshilik qo‘mitasi” anonim Telegram-kanaliga tayanmoqda, u esa Rossiya prezidenti Vladimir Putin tomonidan qisman safarbarlik e’lon qilingan kun — 21-sentabrda ochilgan. Uning ilk postida shunday deyiladi: “Kanal Boshqirdistonda Putin hokimiyatiga qarshi milliy qarshilikni tashkillashtirish uchun yaratildi. Mitinglar va namoyishlar davri o‘tdi, endi faqat Putinning malaylari uchun faqat Molotov kokteyllari va o‘qlar qo‘llaniladi”.
Partizanlar boshqird va tatar qishloqlarida safarbarlikni to‘xtatishni talab qilmoqda. Ular harbiy komissariatlarga, “Yagona Rossiya” idoralariga o‘t qo‘yib, yashirincha faoliyat yuritishga chaqirmoqda. Mansabdorlar bu xatti-harakatlar va bayonotlar yuzasidan hech qanday izoh bergani yo‘q.
“Boshqird milliy siyosiy markazi” 2021-yilda tashkil topgan bo‘lib, u eng yirik “Boshkort” milliy tashkiloti davomchisi, unga ham Gabbasov rahbarlik qilgan, ammo u 2020-yilda ekstremistik harakat deb tan olingan. Gabbasov ikki yil avval Kushtau tog‘ida ommaviy noroziliklarni tashkillashtirgan faollardan biridir.
Gabbasovning tarafdorlari Boshqirdiston uchun suverenitetga erishmoqchi, ular hudud Rossiya tarkibidan chiqib, o‘z armiyasiga ega bo‘lgan mustaqil davlatga aylanishini istayapti.
Rossiyada safarbarlik e’lon qilinganidan keyin “Boshqird milliy siyosiy markazi” “yashirincha faoliyat yuritib, Putin hokimiyatiga qarshi partizanlar urushini olib borish”ga da’vat eta boshlagan. Uning Telegram-kanalida boshqird qo‘shinlari tuzila boshlagani haqida xabarlar paydo bo‘lgan.
Gabbasov nashrga ma’lum qilishicha, safarbarlik boshlangach, ko‘pchilik boshqird faollari Rossiyadan ketib qolgan, qolganlar esa yashirinib yuribdi.
“Ular imperiya uchun jang qilishni xohlamaydi. Bu bizning urushimiz emas, degan fikrda ular. Nima uchun boshqirdlar ‘rus dunyosi’ uchun Ukrainaning qayerlaridadir o‘lib ketishi kerak? Ukrainaliklar bizga hech qanday yomonlik qilgani yo‘q, imperiya esa bizga doim bosim o‘tkazib kelgan. Ular bizning boshqird tilimizga bosim o‘tkazgan, bizning yetakchilarimizni qamagan. Nima uchun endi biz ular uchun jang qilishimiz kerak?” — dedi u.
Izoh (0)