O‘zbekistonning Birlashgan Arab Amirliklaridagi diplomatik vakolatxonalari tomonidan BAAning Facetime Management Service (FMS) kompaniyasi rahbari, Shveysariya biznes kengashi a’zosi Nadin Patrik Kudinning Toshkent va Samarqand shaharlariga tashrifi uyushtirildi. Bu haqda “Dunyo” axborot agentligi xabar qildi.
Qayd etilishicha, ushbu tashrifdan ko‘zlangan maqsad O‘zbekistonda turizm sohasida kadrlar tayyorlashda Shveysariya ta’lim tizimi asosida hamkorlik qilish, “Ishga marhamat” monomarkazlari faoliyati bilan yaqindan tanishish hamda kompaniya bilan hamkorlik qiluvchi Yaqin Sharq, Mavrikiy, Seyshel va Maldiv orollaridagi mehmonxonalarga oziq-ovqat mahsulotlarini eksport qilish masalalalarini muhokama qilishdan iborat bo‘ldi.
BAA delegatsiyasi a’zolari O‘zbekiston Turizm va madaniy meros, Bandlik va mehnat munosabatlari, Oliy va o‘rta-maxsus ta’lim hamda Qishloq xo‘jaligi vazirliklarida uchrashuvlar o‘tkazib, hamkorlik istiqbollarini o‘rgangan. Shuningdek, Toshkent turizm va mehmonxona boshqaruvi texnikumi, “Ishga marhamat” monomarkazi, “Ipak yo‘li” turizm va madaniy meros universiteti, Samarqand turizm va madaniy meros texnikumi faoliyati bilan yaqindan tanishgan.
Muzokaralar chog‘ida “Ipak yo‘li” universiteti va Shveysariya ta’lim akademiyasi o‘rtasida hamkorlikni yo‘lga qo‘yish, Shveysariyada sertifikatsiyadan o‘tgan qo‘shma dasturlarni joriy qilish, xorijlik mutaxassislarning turizm texnikumlari o‘qituvchilarini tayyorlash uchun O‘zbekistonga jalb qilish, talabalar amaliyotini xorijda tashkil qilish, shuningdek, monomarkazlarda kasbga tayyorlash jarayonlari samaradorligini oshirish borasida birgalikda ishlashga qaratilgan takliflar muhokama etilgan.
Joriy yil 30-noyabr—2-dekabr kunlari o‘tkaziladigan Toshkent xalqaro turizm yarmarkasi doirasida hamkorlikka oid hujjatlarni imzolashga kelishib olingan.
Ma’lumot uchun, FMS kompaniyasi 1999-yildan buyon BAAda faoliyat ko‘rsatib, mehmonxonalarga investorlarni jalb qilish, mehmonxona va risortlar qurilishida konsalting xizmatlarini ko‘rsatish, restoranlarda ilg‘or xizmat ko‘rsatish tizimlarini joriy qilish, zamonaviy tajriba markazlarini yaratib, ularning bitiruvchilarini ish bilan ta’minlash masalalari bilan shug‘ullanadi. Swiss Education Academy bilan hamkorlikda Yevropa, Osiyo va Afrika davlatlarida 100 dan ortiq amaliyot dasturlarini amalga oshirgan, Shveysariyaning Cesar Ritz colleges, School of hotel management, Hotel institute Montreux va Swiss hotel management school kabi tashkilotlar bilan hamkorlik qiladi. 15 ta mehmonxona xo‘jaligini foydalanishga topshirgan, Dubay, Bangkok, Moskva, Tokio, Gonkong va Ar-Riyodda turli davlatlar oshxonalarini ishga tushirgan hamdaularga Mishlen sertifikatlarini olishga ko‘maklashgan.
Izoh (0)