Президент Шавкат Мирзиёев таклифи ва ташаббуси билан Қашқадарё вилоятининг Деҳқонобод тумани пистачиликка ихтисослаштирилиб, писта плантациялари ташкил этилган. Туманда 367 гектар лалми ерга писта плантациясини ташкил қилган тадбиркор Ваҳоб Норсафаров нари борса икки-уч йилдан сўнг йилига 1 миллион доллардан даромад олиши мумкинлигини айтмоқда.
Журналист Муроджон Амиров тадбиркорни суҳбатга тортиб, лалми ва қақраган ерлардан даромад олиш сирларини сўради.
Президентимиз Шавкат Мирзиёевнинг лалми, суғорилмайдиган ерлар самарадорлигини ошириш мақсадида берган топшириқлари асосида пистачилик плантациясини яратдик. Туман ҳокими Зоир Алиқулов ёрдами билан писта плантациясини яратиш лойиҳасини ҳам ишлаб чиқдик. Лойиҳани ишлаб чиқишдан олдин тажриба сифатида 550 туп писта кўчатини экдик. Орадан 6 йил ўтиб, тажриба сифатида экилган 1 гектар майдондаги писталар ҳосилга кирди. Ҳозирги кунда 10 та доимий иш ўрни яратилган. Суғориш ҳамда дала ишлари учун 50 нафардан 100 нафаргача мавсумий ишчи жалб қилинган, — дейди тумандаги «Эко комфорт» хусусий корхонаси раҳбари Ваҳоб Норсафаров.
Деҳқонобод тумани ҳокими Зоир Алиқуловнинг таъкидлашича, ҳудудда 367 гектар майдонда пистачилик плантацияси ташкил қилинган.
Лойиҳани бошлаш учун тадбиркор ўз маблағлари ҳисобидан 2,7 миллиард сўм сарфлаган бўлса, банкдан 3,1 миллиард сўм кредит ажратилган. Келажакда тумандаги жами 2,5 минг гектар майдонда мана шу тажриба оммалаштирилиб, пистачилик плантацияси яратилади, — дейди туман ҳокими Зоир Алиқулов.
Туман ҳокимининг тушунтиришича, ҳудудда писта кўчатлари дастлаб махсус майдончада кўкартирилиб олингач, плантация майдонига кўчирилади. Ва шу тариқа ўсишда давом этади.
Ҳокимнинг қўшимча қилишича, тадбиркор Ваҳоб Норсафаров томонидан ташкил қилинган ушбу плантацияни чорва молларидан асраш учун узунлиги 17 км бўлган сим тўсиқлар ўрнатилган.
Писта плантацияларининг яна бир муҳим жиҳати у ерда нафақат писта, каврак ҳам ўстирилади. Каврак шираси ҳам сердаромад маҳсулот олиб, тадбиркор ундан ҳам даромад олади, — дейди Зоир Алиқулов.
Тадбиркор Ваҳоб Норсафаровга юзланиб, лалми ерда кўчат кўкартириш машаққати чўчитмадими дея сўраймиз.
Дастлаб бу ўйлов ҳам бўлди. Аммо бу бизнинг режамизга халал бермади. Боиси, писта кўчатларини сунъий сув ҳавзалари орқали томчилатиб суғориш амалиётини йўлга қўйганмиз. Қолаверса бу борада туман масъуллари ҳам кўмак бериб, йил қурғоқчил келганда сув етказиб беришда ёрдам беришди. Тўғри, қийинчилик ва машаққат бўлди. Аммо кўрсатилган ёрдам ва меҳнатимиз эвазига бу машаққатни ҳам енгиб ўтдик, — дейди тадбиркор.
Ваҳоб Норсафаровнинг маълумот беришича, писта жуда сердаромад маҳсулот бўлиб, дастлабки йилларда писта дарахти ўртача 1 килограммдан ҳосил берса ҳам йилига 100 тонна писта ҳосили олинади. Тахминий иқтисодий кўрсатгичлар бўйича 1 килограмм пистанинг ўртача нархи 10 долларни ташкил қилса, энг кам даромад 1 миллион доллар бўлади.
Қурғоқчил келган йилларда лойиҳа тақдирига вилоят ҳокимилиги ҳам туман ҳокими Зоир Алиқулов бошчилигидаги жамоа ҳам бефарқ бўлмай, суғориш ишлари бўйича барча ёрдамларини аямади. Бунинг учун уларга ташаккур айтаман ва келажакда туман ривожи учун хизмат қиламан, — дейди тадбиркор.
Изоҳ (0)