Farzand dunyoga kelishi quvonchli voqeadir. Ota-onalarni tabriklash uchun kelgan mehmonlar odatda sovg‘a sifatida o‘yinchoq, pinetka va bolalar kombinezonini olib keladi. Afsuski, bu narsalar bolali onaning o‘ziga foyda keltirmaydi. Bunday vaziyatda qanday sovg‘a ko‘proq foydali bo‘lishini quyida bilib oling.
Taglik va nam salfetkalar
Taglik, shubhasiz, yangi onalar arsenalidagi eng ko‘p ishlatiladigan narsalardan biri va ular hech qachon ortiqchalik qilmaydi. Shu sababli ota-onalarga bir nechta qo‘shimcha tagliklar berish juda foydali ish bo‘ladi. Avval ular qaysi brend va boshqa xususiyatlarni afzal ko‘rishini aniqlab olgan ma’qul. Xuddi shu narsa nam salfetkalar uchun ham amal qiladi — ular bolali uyda doim kerak bo‘ladi.
Kosmetika vositalari to‘plami
Bola tug‘ilgandan keyin tashvishlar shunchalik ko‘payadiki, o‘zingizga vaqt topish juda qiyin bo‘lib qoladi. Shuning uchun har qanday ona o‘zining sevimli kosmetika to‘plamini sovg‘a sifatida olishdan juda mamnun bo‘ladi.
Qulay pijama
Bola tug‘ilgandan so‘ng ayollar odatda birinchi haftalarda qulay narsalarni kiyishni xohlashadi, ammo avval sotib olganlari torlik qiladi. Shuning uchun unga keng pijama yoki uy kiyimlari do‘koniga sertifikat berib, xursand qilishingiz mumkin.
Suv idish
Qulay va katta idishda suv olib yursangiz, tez-tez ichasiz va organizm suvsizlanmaydi. Suv idishni funksionalligiga qarab tanlagan ma’qul: issiqni ko‘proq ushlaydigan termos yoki muz bo‘laklarini ham solsa bo‘ladigan kattaroq shishali idish kabi.
Tayyor ovqatlar yoki foydali gazaklar
Tug‘uruqdan so‘ng ba’zida ovqat pishirish u yoqda tursin, hatto ovqatlanishga ham vaqt topish qiyin bo‘ladi. Shuning uchun ovqat qilish haqida tashvishlanmaslik imkoniyatini berish bunday vaziyatda amalga oshirilishi mumkin bo‘lgan eng yaxshi narsadir. Agar o‘zingiz biror narsa pishirish imkoniga ega bo‘lmasangiz va nima buyurtma qilishni bilmasangiz, meva, yong‘oq, oqsilli batonchalar va boshqa sog‘lom gazaklarni sovg‘a sifatida tanlashingiz mumkin.
So‘rg‘ich va qisqichlar
Taglik kabi har qanday onaga so‘rg‘ich doim kerak bo‘ladi, chunki ular kuniga bir necha marta yo‘qolishi mumkin. Bunga qo‘shimcha ravishda bolaning kiyimlariga osongina yopishtiriladigan, so‘rg‘ichni yerga tushirmaslik va ularni yo‘qotmaslik imkonini beradigan maxsus qisqichni sovg‘a qilgan yaxshi.
Katta ryukzak
Farzandli bo‘lgandan so‘ng qulay va keng ryukzak juda kerak bo‘ladi. Oddiy sumkalardan farqli o‘laroq, u qo‘llaringizni bo‘shatish imkonini beradi, shu bilan birga o‘zingiz bilan kerak bo‘lgan hamma narsani — tagliklar, salfetkalar, ovqat idishi, bola kiyimlari va hokazolarni olib yurishingiz mumkin.
Bolalar aravachasi qo‘lqoplari
Ehtimol, bunday qo‘lqoplar bema’ni sovg‘a bo‘lib tuyular, ammo qishda aravachada yuradigan onalarga juda kerak bo‘ladi. Ularning odatiy qo‘lqoplardan ustunligi shundaki, ular tutqichga biriktirilgan. Shuning uchun uydan chiqayotganda ularni unutmaysiz, cho‘ntagingizga solib qo‘yish ham shart emas.
Izoh (0)