Фарзанд дунёга келиши қувончли воқеадир. Ота-оналарни табриклаш учун келган меҳмонлар одатда совға сифатида ўйинчоқ, пинетка ва болалар комбинезонини олиб келади. Афсуски, бу нарсалар болали онанинг ўзига фойда келтирмайди. Бундай вазиятда қандай совға кўпроқ фойдали бўлишини қуйида билиб олинг.
Таглик ва нам салфеткалар
Таглик, шубҳасиз, янги оналар арсеналидаги энг кўп ишлатиладиган нарсалардан бири ва улар ҳеч қачон ортиқчалик қилмайди. Шу сабабли ота-оналарга бир нечта қўшимча тагликлар бериш жуда фойдали иш бўлади. Аввал улар қайси бренд ва бошқа хусусиятларни афзал кўришини аниқлаб олган маъқул. Худди шу нарса нам салфеткалар учун ҳам амал қилади — улар болали уйда доим керак бўлади.
Косметика воситалари тўплами
Бола туғилгандан кейин ташвишлар шунчалик кўпаядики, ўзингизга вақт топиш жуда қийин бўлиб қолади. Шунинг учун ҳар қандай она ўзининг севимли косметика тўпламини совға сифатида олишдан жуда мамнун бўлади.
Қулай пижама
Бола туғилгандан сўнг аёллар одатда биринчи ҳафталарда қулай нарсаларни кийишни хоҳлашади, аммо аввал сотиб олганлари торлик қилади. Шунинг учун унга кенг пижама ёки уй кийимлари дўконига сертификат бериб, хурсанд қилишингиз мумкин.
Сув идиш
Қулай ва катта идишда сув олиб юрсангиз, тез-тез ичасиз ва организм сувсизланмайди. Сув идишни функционаллигига қараб танлаган маъқул: иссиқни кўпроқ ушлайдиган термос ёки муз бўлакларини ҳам солса бўладиган каттароқ шишали идиш каби.
Тайёр овқатлар ёки фойдали газаклар
Туғуруқдан сўнг баъзида овқат пишириш у ёқда турсин, ҳатто овқатланишга ҳам вақт топиш қийин бўлади. Шунинг учун овқат қилиш ҳақида ташвишланмаслик имкониятини бериш бундай вазиятда амалга оширилиши мумкин бўлган энг яхши нарсадир. Агар ўзингиз бирор нарса пишириш имконига эга бўлмасангиз ва нима буюртма қилишни билмасангиз, мева, ёнғоқ, оқсилли батончалар ва бошқа соғлом газакларни совға сифатида танлашингиз мумкин.
Сўрғич ва қисқичлар
Таглик каби ҳар қандай онага сўрғич доим керак бўлади, чунки улар кунига бир неча марта йўқолиши мумкин. Бунга қўшимча равишда боланинг кийимларига осонгина ёпиштириладиган, сўрғични ерга туширмаслик ва уларни йўқотмаслик имконини берадиган махсус қисқични совға қилган яхши.
Катта рюкзак
Фарзандли бўлгандан сўнг қулай ва кенг рюкзак жуда керак бўлади. Оддий сумкалардан фарқли ўлароқ, у қўлларингизни бўшатиш имконини беради, шу билан бирга ўзингиз билан керак бўлган ҳамма нарсани — тагликлар, салфеткалар, овқат идиши, бола кийимлари ва ҳоказоларни олиб юришингиз мумкин.
Болалар аравачаси қўлқоплари
Эҳтимол, бундай қўлқоплар бемаъни совға бўлиб туюлар, аммо қишда аравачада юрадиган оналарга жуда керак бўлади. Уларнинг одатий қўлқоплардан устунлиги шундаки, улар тутқичга бириктирилган. Шунинг учун уйдан чиқаётганда уларни унутмайсиз, чўнтагингизга солиб қўйиш ҳам шарт эмас.
Изоҳ (0)