Turkiyada 24 qavatli osmono‘par bino yonib ketdi (video)

Istanbulning Fikirtepe tumanidagi 24 qavatli osmono‘par bino yonib ketdi, deb xabar bermoqda Turkiyaning Oda TV nashri.

Osmono‘par binoning pastki qavatida yuzaga kelgan yong‘in ko‘p o‘tmay yon tomondagi yo‘lak orqali yuqori qavatlarga ko‘tarilgan.

Biroz vaqt o‘tgach, o‘t o‘chiruvchilarning sa’y-harakatlari bilan yong‘in bartaraf etilib, bino nazoratga olingan. 24 qavatli binodagi yong‘in sabablari hozircha noma’lum.

Istanbul meri Ekrem Imomo‘g‘li yong‘inda halok bo‘lganlar yo‘qligini aytdi.

“Fikirtepe tumanida ko‘p qavatli uydagi yong‘in o‘t o‘chiruvchilarimiz tomonidan nazoratga olindi. Evakuatsiya qurbonlarsiz amalga oshirildi. Yong‘in kelib chiqish sabablari tekshiruvdan so‘ng ma’lum bo‘ladi”, — deyiladi xabarda.