Rossiya prezidenti Vladimir Putin tojikistonlik hamkasbi Emomali Rahmonning Markaziy Osiyoga sobiq SSSR sifatida qaramaslik haqidagi chaqirig‘iga javob qaytardi. Bu haqda “TASS” yozmoqda.
Putin SSSRning milliy siyosatiga to‘xtalib, sovet davrida ittifoq respublikalari xalqlarining madaniyati va iqtisodiyotini rivojlantirish bilan shug‘ullanilganini ta’kidladi. Uning fikricha, Markaziy Osiyo mamlakatlariga, jumladan, iqtisodiy hamkorlik sohasida yetarlicha e’tibor va hurmat ko‘rsatilgani yo‘q va u bundan afsusda.
“Men Emomali Sharipovich aytgan gaplardan boshlamoqchi edim. Ha, haqiqatan ham, u haq. Albatta, Sovet Ittifoqida milliy tillarda kitoblar nashr etilib, teatrlar ochildi, madaniyat va iqtisodiyot rivojlandi”, — deydi Putin.
“Ammo bugun, albatta, biz barcha formatlarimizni, shu jumladan, yangi sammit formatini aniq mazmun bilan to‘ldirishimiz kerak”, — deya davom etdi Putin Rossiya va Markaziy Osiyo mamlakatlari o‘rtasidagi iqtisodiy hamkorlik haqida gapirarkan.
Uning so‘zlariga ko‘ra, bu uchrashuvdan maqsad shunchaki gaplashish emas, balki mintaqaviy loyihalarni ko‘rib chiqish, ularni mavjud imkoniyatlar bilan uyg‘unlashtirish va nafaqat ikki tomonlama, balki mintaqaviy miqyosda ham ilgari surishdir. Putin bu orqali ko‘p masalalarni samarali hal qilish mumkinligini aytib o‘tdi.
Rahmon nima degandi?
Ostonada bo‘lib o‘tgan sammit davomida Tojikiston prezidenti Emomali Rahmon Rossiya prezidenti Vladimir Putinga XXI asrda imperatorlik usullariga yo‘l qo‘yib bo‘lmasligini, Markaziy Osiyo davlatlariga sobiq SSSR sifatida qaramaslik, hurmat qilish zarurligini aytgan.
“Ha, biz kichik xalqmiz, biz 100—200 million emasmiz, lekin bizda tarix, madaniyat bor, biz xalqmiz, bizni hurmat qilishni xohlaymiz. Biz tilanchi emasmiz. Bizda boy davlat bor. Vladimir Vladimirovich, iltimosimiz shuki, Markaziy Osiyo davlatlariga nisbatan sobiq ittifoqqa nisbatan siyosat yuritilmasin. Biz oltin o‘rtani topib, har bir respublika bilan alohida ishlashimiz kerak”, — deydi Emomali Rahmon Ostonadagi sammitda so‘zlagan nutqida.
Uning so‘zlariga ko‘ra, Rossiya oziq-ovqat sohasida MDH davlatlari bilan hamkorlik qiladi va savdoni rivojlantiradi, lekin buning evaziga teng munosabat ko‘rsatmaydi.
“Biz siz bilan birga Sovet ittifoqi parchalanganiga guvoh bo‘ldik. Hozir bo‘lgani kabi kichik respublikalarga, mayda xalqlarga e’tibor yo‘qligiga guvoh bo‘ldik. An’analar, urf-odatlar e’tiborga olinmagan. Biz taraqqiyotni qo‘llab-quvvatlamadik. Kecha siz ikki million haqida gapirdingiz (Rossiya Federatsiyasidagi Tojikistondan kelgan muhojirlar). Sizga shuni aytmoqchimanki, ikki milliondan ortiq fuqarolarimiz Rossiya Federatsiyasiga nafaqat ishlash, balki o‘qish, davolanish uchun ham boradi”, — dedi Tojikiston prezidenti.
Shuningdek, U Markaziy Osiyo mamlakatlari va Rossiyaning qo‘shniligiga e’tibor qaratib, “o‘zaro uzoqlashib bo‘lmasligini” ta’kidlagan.
Izoh (0)