Janubiy Koreyaning Hyundai avtomobilsozlik kompaniyasi oktabr oyida AQSHda elektromobillar va akkumulatorlar ishlab chiqaradigan zavod qurilishini boshlashini ma’lum qildi. Bu haqda Reuters xabar bermoqda.
Loyiha qiymati 5,5 milliard dollarga baholanmoqda, — deyiladi xabarda kompaniya bayonotiga tayanib.
Jorjiya shtatining Savanna shahrida 25-oktabr kuni zavodning poydevorini qo‘yish rejalashtirilgan. Korxonaning yillik quvvati 300 mingta avtomobilni tashkil etadi.
Hyundai zavodda 2025-yilning birinchi yarmida tijorat ishlab chiqarishni yo‘lga qo‘ymoqchi. Loyiha Hyundai’ning 10 milliard dollarlik “AQSHda harakatchanlikni, jumladan, elektr transport vositalarini rivojlantirish” strategiyasining bir qismidir.
Avgust oyida AQSH prezidenti Jo Bayden 2022-yilga qadar inflyatsiyani pasaytirish to‘g‘risidagi qonun loyihasini imzoladi.
Xususan, qonunda elektr transport vositalarini sotib olish uchun soliq subsidiyalari ajratilishi nazarda tutilgan.
Ammo bu qoida faqat Shimoliy Amerikada yig‘ilgan elektromobillarga tegishli bo‘lib, AQSH bozorida mahalliy ishlab chiqaruvchilar — Tesla va General Motors’ga ustunlik beradi.
Janubiy Koreya ishlab chiqaruvchilari bu qarordan xavotida. Bayden sentyabr oyida Janubiy Koreya prezidenti Yun Suk Yolga yo‘llagan maktubida yangi qoidalar Janubiy Koreya avtomobil ishlab chiqaruvchilariga zarar keltirmasligiga ishontirib, bu masalani muhokama qilishga tayyorligini ma’lum qilgan edi.
Izoh (0)