Termizdagi binolar 62 mlrd so‘mga auksionga qo‘yildi

Surxondaryo viloyati, Termiz shahridagi bino-inshootlar kompleksi kimoshdi savdosiga qo‘yildi. Lot ma’lumotlari “E-auksion” portalida e’lon qilingan.

Lot auksionga Davlat aktivlarini boshqarish agentligining Surxondaryo viloyat hududiy boshqarmasi tomonidan joylashtirilgan.

Asosiy faoliyat turi sifatida xizmat ko‘rsatish keltirilgan ushbu kompleksda savdo do‘koni, omborxona, yotoqxona, ma’muriy binolar hamda qishloq xo‘jaligi mahsulotlarini qayta ishlash (quritish) dastgohlari, saqlash uchun muzlatkich bino-inshootlari mavjud.

Yer uchastkasining umumiy maydoni — 0,45 gektar. Binoning maydoni — 2 442 kvadrat metr. Unda gaz, suv, elektr ta’minoti mavjud, kanalizatsiya tizimi esa yo‘q.

Auksionga qo‘yilgan inshootning boshlang‘ich bahosi — 66,2 mlrd so‘m. Arizalar 11-noyabr 09:00 ga qadar qabul qilinadi. Savdolar xuddi shu kuni 10:00 da boshlanadi.

Avvalroq sobiq “Buxoroteks”ga qarashli majmua auksionda 110 mlrd so‘mga sotilgani haqida xabar berilgandi.