“Avval vahshiylarcha o‘ldirib, keyin Spark’ka solib yoqib yuborgan” — Jizzaxda o‘ta og‘ir jinoyat sodir etgan shaxslarga sud hukmi o‘qildi

Jizzax viloyatida giyohvandlik moddalari savdosi bilan shug‘ullanib kelgan shaxsni avval vahshiylarcha urib o‘ldirib, keyin mashinasiga solib yoqib yuborgan jinoyatchilarga hukm o‘qildi.

“Daryo” nashri “Bir jinoyat izidan” ko‘rsatuvidagi ma’lumotlarga tayangan holda material tayyorladi.

2021-yilning 28-dekabr kuni Jizzax viloyatining G‘allaorol tumani Ichki ishlar bo‘limiga xabar kelib tushgan. Unga ko‘ra, Nayman qishlog‘i hududidagi dala maydonida davlat raqamisiz bo‘lgan Spark avtomashinasi avtohalokat tufayli yonib ketgani aytilgan. Voqea joyiga tezkor tergov guruhi yetib borib, kuyib kul bo‘lgan Spark avtomashinasi ko‘zdan kechirgan.

Samandar Razzoqov G‘allaorol tumani prokurori:

2021-yilning 28-dekabr kuni soat taxminan 09:30 larda tuman Ichki ishlar bo‘limi tomonidan berilgan ma’lumotga ko‘ra, tumanning Nayman qishlog‘i hududida joylashgan Abdumajid Abdug‘affor fermer xo‘jaligi dala maydonida Spark avtomashinasining yongan holati bo‘yicha ma’lumot kelib tushdi.

Mazkur ma’lumotga ko‘ra, voqea joyida tezkor xodimlar bilan yetib borilganda, u yerda oq rangli Spark avtomashinasining ichida yonib ketgan shaxsi noma’lum murda borligi aniqlandi.

Holat yuzasidan shu kunning o‘zida Jinoyat kodeksining 97-moddasi 2-qismi (javobgarlikni og‘irlashtiradigan holatlarda qasddan odam o‘ldirish) bilan jinoyat ishi qo‘zg‘atildi hamda tergov harakatlariga kirishildi.

Otajon Qodirov Jizzax viloyati prokuraturasining katta tergovchisi:

Akmal Abdullayev marixuana giyohvandlik vositalarining savdosi bilan shug‘ullanib kelgan va mazkur jinoyat ishi bo‘yicha marhum Safarov Aminjonga 2021-yil oktabr—dekabr oylarida ikki yuz to‘qson gramm giyohvandlik vositasini ikki ming dollarga sotgan. Shundan so‘ng Akmal Abdullayev Aminjon Safarovdan giyohvandlik vositalari uchun pul talab qilganda Safarov Aminjon pullarni yana so‘ragan taqdirda huquqni muhofaza qiluvchi organlarga xabar berishini ma’lum qilgan.

Yangi tanishi Aminjon Safarovdan yashil rangli, o‘tkir hidli, quritilgan holdagi o‘simlik tarkibida giyohvand moddasi mavjud bo‘lgan marixuanani olib tatib ko‘ra boshlaydi. Bir yil ichida Akmal Abdullayev Aminjan Safarovdan qarz bo‘lib qoladi. Kunora qarzini qistagan Aminjonni ko‘rgani ko‘zi yo‘q. Beray desa qo‘lida puli yo‘q. O‘ylab, o‘ylab Akmal Abdullayev qishloqdoshlaridan jinoyatga moyil, biror ishning boshini tutmagan, bekorchi yigitlarni to‘plab jinoiy reja tuzadi.

Otajon Qodirov, Jizzax viloyati prokuraturasining katta tergovchisi:

Akmal Abdullayev Aminjon Safarovni o‘ldirishni maqsad qilib, bu yo‘lda o‘zining tanishlari, bir qishloqda yashovchi Vafoyev Yashin hamda Qodirov Elmurodlarni jalb qiladi. Ular Jonboy tumani markazida Safarov Aminjonni o‘ldirish rejasini tuzadi.

Jinoiy rejaga muvofiq ular o‘zlari bilan birgalikda jinoyat qurollari bo‘lmish — bolg‘a, tesha hamda maxsus yelim idishda benzin yoqilg‘isini olishadi. Shundan so‘ng 2021-yil 27-dekabr kuni Safarov Aminjonga qo‘ng‘iroq qilib, unga giyohvandlik vositasi sotishni ma’lum qilganidan so‘ng o‘zi bilan birgalikda pul olib kelishini tayinlaydi va uchrashuv joyini Samarqand viloyati Jomboy tuman Qoraariq qishlog‘idagi soy bo‘yini tanlaydi. Shundan so‘ng, tushdan keyin Safarov Aminjon o‘zining boshqaruvidagi Spark rusumli avtomashinada voqea joyiga yetib keladi va Abdullayev, Vafoyev, Qodirovlar birgalikda uning tanasining turli joylariga yuqorida aytib o‘tilgan bolg‘a, tesha va qo‘llari bilan og‘ir tan jarohat yetkazib, uni qasddan o‘ldiradi.

Jinoyatni yashirish maqsadida Aminjon Safarovning jasadini uning boshqaruvida bo‘lgan Spark avtomashinaga joylab, G‘allaorol tumaniga olib keladi. Tumanidagi fermer xo‘jaligining dala maydonida Spark mashinasini to‘xtatib, Aminjon Safarov va Spark avtomashinasiga benzin yoqilg‘isini quyib, zavurga mashinani tushurgan holatda yoqib yuboradi. Avtomashina davlat belgisini yashirib, voqea joyidan yashiringan.

Sud tibbiy ekspertizasining xulosasiga ko‘ra, Safarov Aminjonning o‘limi hayotiga bevosita tahdid soladigan ochiq yuqori va pastki jag‘ suyagi sinish jarohati, yuqori labining yirtilishi, chap jag‘ suyagining sinish jarohati va bosh miyaga qon quyilishi, qattiq jism ta’sirida yetkazilgan og‘ir jarohatlar natijasidan yuzaga kelgan.

Dastlabki tergov harakatlari davomida ayblanuvchilar Abdullayev, Vafoyev, Qodirovlar tomonidan sodir etilgan o‘ta og‘ir jinoyatlar to‘liq fosh etildi. Ularning jinoyati tergov hujjatlari, kimyoviy ekspertiza, sud ekspertiza, biologik ekspertizalar bilan to‘liq tasdiqlandi. Jinoyat ishlari bo‘yicha to‘plangan dalillardan kelib chiqib, bularga nisbatan Jinoyat kodeksining 97-moddasi 2-qismi (javobgarlikni og‘irlashtiradigan holatlarda qasddan odam o‘ldirish), 164-moddasi 3- qismi va boshqa moddalar bilan ayblov e’lon qilinib, jinoyat ishi ularning aybi to‘g‘ri tasdiqlangan holda sudga yuborilgan.

Iroda Muhammedova, Jinoyat ishlari bo‘yicha Jizzax shahar sudining sudyasi:

Jinoyat ishlari bo‘yicha Jizzax shahar sudining 2022-yil 14-iyundagi hukmi bilan javobgarligini og‘irlashtiruvchi holatlarda qotillik jinoyatiga qo‘l urgan 3 shaxs, Jinoyat kodeksining 97-moddasi 2-qismi “i”, “p” bandlari (javobgarlikni og‘irlashtiradigan holatlarda qasddan odam o‘ldirish — tamagirlik niyatida, bir guruh shaxslar yoki uyushgan guruh a’zosi tomonidan yoxud o‘sha guruh manfaatlarini ko‘zlagan holda), 164-moddasi 3-qismi “g” bandi (bosqinchilik — badanga og‘ir shikast yetkazgan holda sodir etish) va boshqa moddalar bilan aybli deb topilgan.

Ularning har biriga ozodlikdan mahrum qilish tarzdagi jazo tayinlandi. Abdullayev Akmalga nisbatan uzil-kesil 20 yil muddatga, Vafoyev Yashinga nisbatan 19 yil muddatga, Qodirov Elmurodga nisbatan esa 16 yil muddatga ozodlikdan mahrum qilish jazolari tayinlangan.