Tojikiston prezidenti Emomali Rahmon Rossiya prezidenti Vladimir Putinning 70 yillik yubileyiga olib borgan mevalarning barchasi Sankt-Peterburgdagi bolalar uylariga tarqatib berildi. Ularni tashish uchun oltita yuk mashinasi kerak bo‘ldi. Bu haqda Rossiya prezidenti ishlari boshqarmasi “VKontakte”dagi sahifasi orqali xabar berdi.
Ta’kidlanishicha, bu Rossiya rahbari Vladimir Putinning topshirig‘iga ko‘ra amalga oshirilgan.
2022-yil 7-oktabr kuni Sankt-Peterburgdagi Konstantin saroyida MDH davlatlari rahbarlarining norasmiy uchrashuvi o‘tkazilgandi. O‘sha kuni Putinning 70 yillik yubileyi edi. Shu munosabat bilan Emomali Rahmon unga Tojikistondan keltirilgan mevalarni tortiq qildi.
Emomali Rahmonning sovg‘asi Konstantin saroyida tarvuzlar va qovunlardan iborat ikkita piramida ko‘rinishida namoyish etildi, qolgan mevalar ushbu piramidalar atrofiga terib chiqildi.
Ta’kidlash joiz, Turkmaniston prezidenti Serdar Berdimuhamedov ham rossiyalik hamkasbiga 30 quti meva-sabzavotlar sovg‘a qilgandi, ammo ularning taqdiri hozircha noma’lum.
Izoh (0)