2022-yilning sentabr oyida yillik inflyatsiya darajasi 12,2 foizni, oziq-ovqat mahsulotlari inflyatsiyasi esa 16,6 foizni tashkil etdi. Bu haqda Markaziy bank hisobotidan ma’lum bo‘ldi.
Hududlar kesimida, 8 ta hududda inflyatsiya ko‘rsatkichlari O‘zbekiston bo‘yicha o‘rtacha umumiy inflyatsiya darajasidan baland bo‘ldi.
Bunda, Qoraqalpog‘iston Respublikasi, Navoiy, Sirdaryo, Surhondaryo va Namangan viloyatlarida oziq-ovqat narxlari o‘sishi sur’atlari qolgan hududlarga nisbatan yuqoriroq ekanligini ko‘rish mumkin.
Shuningdek sentabr oyida aholi tomonidan sezilgan inflyatsiya pasayuvchi dinamikani davom ettirib, 14,8 foizni tashkil etdi.
Mamlakat hududlari kesimida sezilgan inflyatsiyaning nisbatan yuqori ko‘rsatkichlari Buxoro, Namangan viloyatlari va Toshkent shahrida kuzatilgan bo‘lsa, nisbatan past ko‘rsatkichlar Navoiy, Andijon hamda Surxondaryo viloyatlarida qayd etildi.
Avvalroq O‘zbekistonda biznes sohasi vakillari kelgusi bir yilda narxlar 13,8 foizga oshishini kutayotgani haqida xabar berilgan edi.
Izoh (0)